Uncategorized

दुष्काळाच्या पार्श्वभूमीवर शिरूरमध्ये नवीन नळजोडण्यांना निर्बंध; नगरपरिषदेचा महत्त्वपूर्ण ठराव

शिरूर { डेली न्यूज पोस्ट टीम 24}: शहरातील घटता पाणीसाठा आणि आगामी काळातील संभाव्य पाणीटंचाई लक्षात घेऊन शिरूर नगरपरिषदेने नवीन नळजोडण्या देण्याबाबत निर्बंध आणण्याचा महत्त्वपूर्ण निर्णय घेतला आहे. यासंदर्भात नगरपरिषदेच्या सर्वसाधारण सभेत ठराव मंजूर करण्यात आला.

नगराध्यक्षा ऐश्वर्या अभिजित पाचर्णे यांच्या अध्यक्षतेखाली झालेल्या या सभेला उपनगराध्यक्ष नितीन पाचर्णे, मुख्याधिकारी प्रीतम पाटील यांच्यासह नगरसेवक व नगरसेविका उपस्थित होते.

यंदाची दुष्काळी परिस्थिती आणि शिरूर परिसरातील कमी होत चाललेला पाणीसाठा यावर सभेत चर्चा करण्यात आली. शहरातील उपलब्ध पाणीसाठ्याचे नियोजन आणि पाणीटंचाईची संभाव्य परिस्थिती लक्षात घेऊन नवीन नळजोडण्यांबाबत धोरण निश्चित करण्याचा निर्णय घेण्यात आला. यावेळी नगराध्यक्षा ऐश्वर्या पाचर्णे, नगरसेविका रिंकू जगताप यांनी विविध सूचना मांडल्या.

शहरात सध्या २३ हातपंप असून संभाव्य पाणीटंचाईचा विचार करून नवीन हातपंप बसविण्याबाबतही चर्चा झाली. शांतीनगर परिसरात नवीन हातपंपाची आवश्यकता असल्याची मागणी नगरसेविका चारुशीला कोळपकर यांनी केली.

दरम्यान, शिरूर शहराला पाणीपुरवठा करणाऱ्या घोडनदीवरील कोल्हापूर पद्धतीच्या बंधाऱ्यात गाळ साचल्याने तसेच अन्य कारणांमुळे पाणी साठवण क्षमतेत १० ते १५ टक्क्यांनी घट झाल्याची बाब सभेत समोर आली. यावर नगरसेवक उमेश शेळके यांनी बंधाऱ्यातील गाळ तातडीने काढण्याची सूचना केली. नगरसेवक संतोष थेऊरकर यांनी जोशीवाडी येथील पाण्याच्या टाकीसंदर्भात विविध सूचना मांडल्या.

यावेळी मुख्याधिकारी प्रीतम पाटील यांनी शहरातील नवीन पाणीपुरवठा योजनेचे काम सुरू असून, ते पूर्ण झाल्यानंतर पाण्याचा प्रश्न मार्गी लागण्यास मदत होईल, असे सांगितले. तसेच हत्ती डोह येथील बंधाऱ्यातील गाळ काढण्याबाबत पाटबंधारे विभाग आणि तहसीलदार कार्यालयाशी चर्चा करून पुढील निर्णय घेण्यात येईल, असे स्पष्ट केले.

सभेत बांधकाम समिती सभापती सुनील जाधव, एजाज बागवान, डॉ. सुनीता पोटे, माजी उपनगराध्यक्ष मितेश गदिया यांच्यासह सदस्यांनीही शहरातील पाणीपुरवठा आणि पाणीटंचाईच्या प्रश्नावर विविध सूचना मांडल्या.

Related Articles

Leave a Reply

Your email address will not be published. Required fields are marked *

Back to top button