Uncategorized

पुणे-अहिल्यानगर महामार्गालगत अनोळखी व्यक्तीचा मृतदेह आढळला; शिरूर पोलिसांत आकस्मिक मृत्यूची नोंद

शिरूर { डेली न्यूज पोस्ट टीम 24}: पुणे-अहिल्यानगर महामार्गावरील बोऱ्हाडेमळा परिसरातील न्हावरा फाटा येथे एका अनोळखी पुरुषाचा मृतदेह आढळून आल्याने परिसरात खळबळ उडाली आहे. अंदाजे ३५ ते ४० वर्षे वयोगटातील या व्यक्तीची अद्याप ओळख पटलेली नसून, याप्रकरणी शिरूर पोलिसांनी आकस्मिक मृत्यूची नोंद केली आहे.

रविवारी (दि. ८ नोव्हेंबर) सायंकाळी साडेसातच्या सुमारास न्हावरा फाटा येथील लक्ष्मी मार्ट किराणा दुकानाशेजारी महामार्गालगत एक व्यक्ती बेशुद्ध अवस्थेत पडल्याची माहिती एका नागरिकाने दुकानाचे मालक रितेश एकनाथ आवटे यांना दिली. आवटे यांनी घटनास्थळी जाऊन पाहणी केली असता संबंधित व्यक्ती कोणतीही हालचाल करीत नसल्याचे त्यांच्या निदर्शनास आले. त्यांनी तत्काळ डायल ११२ वर संपर्क साधून पोलिसांना माहिती दिली.

माहिती मिळताच शिरूर पोलिसांनी घटनास्थळी धाव घेतली. त्यानंतर संबंधित व्यक्तीला खासगी रुग्णवाहिकेद्वारे शिरूर ग्रामीण रुग्णालयात दाखल करण्यात आले. मात्र, वैद्यकीय अधिकाऱ्यांनी तपासणीअंती रात्री ९.४० वाजण्यापूर्वीच त्याचा मृत्यू झाल्याचे घोषित केले.

मयत व्यक्तीचे वय अंदाजे ३५ ते ४० वर्षे असून, अंगात पांढऱ्या रंगाचा पूर्ण बाह्यांचा शर्ट व काळ्या रंगाची पँट आहे. तसेच दाढी आणि डोक्याचे केस वाढलेले आहेत. या वर्णनावरून संबंधित व्यक्तीची ओळख पटविण्याचे आवाहन करण्यात येत आहे.

याप्रकरणी शिरूर पोलीस ठाण्यात आकस्मिक मृत्यू रजिस्टर क्रमांक १८७/२०२६ अन्वये भारतीय नागरिक सुरक्षा संहितेच्या कलम १९४ प्रमाणे नोंद करण्यात आली आहे. पोलीस हवालदार एस. पी. खबाले पुढील तपास करीत असून, पोलीस निरीक्षक विनोद पाटील यांच्या मार्गदर्शनाखाली तपास सुरू आहे.

Related Articles

Leave a Reply

Your email address will not be published. Required fields are marked *

Back to top button