शिरूर नगरपालिकेच्या राजकारणात दिवाळीपूर्वीच राजकीय फटाके

शिरूर { डेली न्यूज पोस्ट टीम 24}शिरूर नगरपालिकेच्या राजकारणात दिवाळीपूर्वीच राजकीय फटाके फुटू लागले असून, भाजप आणि राष्ट्रवादी काँग्रेसच्या अजित पवार गटाने एकत्र येण्याने सत्तेची नवी समीकरणे आकाराला आली आहेत. काही दिवसांपूर्वी राष्ट्रवादी काँग्रेसच्या शरदचंद्र पवार गटाने अजित पवार गटाचा पाठिंबा काढून घेतल्यानंतर पालिकेतील राजकीय गणितांबाबत उत्सुकता निर्माण झाली होती. या पार्श्वभूमीवर भाजप आणि अजित पवार गटाची जवळीक वाढल्याने शहराच्या राजकारणासह तालुक्यातील राजकीय समीकरणांवरही त्याचे पडसाद उमटण्याची शक्यता आहे.भाजपाचे पाठिंबाचे पत्र शहराध्यक्ष नगरसेवक नितीन पाचर्णे यांनी नगराध्यक्षा ऐश्वर्या पाचर्णे यांच्याकडे सुपूर्त केले आहे.

शिरूर नगरपालिकेच्या निवडणुकीत २४ जागांपैकी भाजपने ११ जागा जिंकत सर्वाधिक नगरसेवक निवडून आणले होते. अजित पवार गटाला सात, तर शरदचंद्र पवार गटाला पाच जागा मिळाल्या. एक अपक्ष नगरसेवक अजित पवार गटाच्या बाजूने गेला होता. संख्याबळाच्या दृष्टीने भाजप सर्वांत मोठा पक्ष ठरला असतानाही दोन्ही राष्ट्रवादी काँग्रेस गट एकत्र आल्याने भाजपला सत्तेबाहेर राहावे लागले होते. नगराध्यक्षपदी अजित पवार गटाच्या ऐश्वर्या अभिजीत पाचर्णे निवडून आल्या होत्या.

मात्र, अलीकडे शरदचंद्र पवार गटाने अजित पवार गटाचा पाठिंबा काढून घेतल्याने पालिकेतील सत्तेची फेरमांडणी होण्याची चर्चा सुरू झाली. सुरुवातीला शरदचंद्र पवार गट आणि भाजप एकत्र येतील, अशी शक्यता व्यक्त केली जात होती. प्रत्यक्षात भाजप आणि अजित पवार गट जवळ आल्याने राजकीय चर्चांना नवे वळण मिळाले आहे.
जिल्हा परिषद आणि पंचायत समितीच्या निवडणुकीत दोन्ही राष्ट्रवादी काँग्रेस गट एकत्र लढले होते, तर भाजप स्वतंत्रपणे मैदानात उतरला होता. बाजार समितीच्या निवडणुकीत मात्र भाजपमधील काही नेते अजित पवार गटाच्या पॅनेलसोबत, तर राहुल बाबुराव पाचर्णे यांच्यासह काही नेते शरदचंद्र पवार गटाचे माजी आमदार अशोक पवार यांच्या पॅनेलसोबत गेले होते. या घडामोडींमुळे स्थानिक पातळीवरील राजकीय संबंध आणि पक्षीय समीकरणे बदलत असल्याचे चित्र निर्माण झाले होते.

विद्यमान आमदार माऊली कटके आणि माजी आमदार अशोक पवार यांच्यातील राजकीय वर्चस्वाच्या संघर्षाच्या पार्श्वभूमीवर या नव्या समीकरणांना महत्त्व प्राप्त झाले होते. बाजार समितीच्या निवडणुकीत राहुल पाचर्णे आणि अशोक पवार एकत्र आल्याने पुढील काळात कोणती राजकीय आघाडी आकाराला येणार, याबाबत उत्सुकता होती. आता पालिकेत भाजप आणि अजित पवार गट एकत्र आल्याने या घडामोडींचा परिणाम आगामी राजकारणावर होऊ शकतो.

या नव्या समीकरणाचे आणखी एक वैशिष्ट्य म्हणजे पाचर्णे कुटुंबातील राजकीय नेते एकत्र येणे. भाजपचे राहुल पाचर्णे आणि नितीन पाचर्णे, तसेच राष्ट्रवादी काँग्रेसच्या नगराध्यक्षा ऐश्वर्या पाचर्णे आणि नगरसेवक अभिजीत पाचर्णे हे सर्व जण एकत्र आले आहे.
पालिकेतील सत्तेच्या माध्यमातून भाजपच्या नगरसेवकांना विविध पदांवर संधी मिळण्याची शक्यता निर्माण झाली आहे.

केंद्र आणि राज्यात सत्तेत असलेले भाजप व अजित पवार गट आता पालिकेतही एकत्र आल्याने शहराच्या विकासकामांसाठी शासनाच्या योजनांचा लाभ मिळवून देण्याचे आव्हान या नव्या समीकरणासमोर असेल. पाणीपुरवठा, रस्ते आणि नागरी सुविधांसह शहराच्या विकासाला कितपत गती मिळते, याकडे नागरिकांचे लक्ष राहणार आहे. त्याचबरोबर या युतीचा शिरूर तालुक्यातील आगामी राजकीय घडामोडींवर किती प्रभाव पडतो, हेही महत्त्वाचे ठरणार आहे.