शिरूर विधानसभा मतदारसंघाच्या मतदारसंख्येत तब्बल १ लाख ९ हजार ८४५ मतदारांची घट

शिरूर { डेली न्यूज पोस्ट टीम 24}भारत निवडणूक आयोगाच्या विशेष सखोल पुनरिक्षण (SIR) कार्यक्रमांतर्गत १९८ शिरूर विधानसभा मतदारसंघाची प्रारूप मतदारयादी ३१ ऑगस्ट रोजी प्रसिद्ध करण्यात आली. या पुनरिक्षणापूर्वी मतदारसंघात ४ लाख ८१ हजार ९९० मतदार होते. प्रारूप यादीत ही संख्या ३ लाख ७२ हजार १४५ इतकी झाली असून, तब्बल १ लाख ९ हजार ८४५ मतदारांची घट झाली आहे.

या प्रक्रियेत ६६ हजार ९७ मतदार आढळून आले नाहीत, १८ हजार ८०६ मतदारांचे स्थलांतर झालेले आढळले, १५ हजार ६२५ मतदार मृत असल्याचे निष्पन्न झाले, तर ८ हजार ६८९ मतदारांची नावे दुबार असल्याचे आढळून आले. याशिवाय ६२८ मतदार इतर कारणांमुळे यादीतून वगळण्यात आले आहेत.

दरम्यान, सन २००२ च्या मतदारयादीत नाव असलेल्या मात्र प्रारूप यादीतून वगळलेल्या मतदारांना आवश्यक पुरावे सादर करून नाव पुन्हा समाविष्ट करण्याची संधी देण्यात आली आहे. तसेच मतदारयादीतील मजकुरामध्ये दुरुस्ती अथवा बदल असल्यास विहित कागदपत्रांसह हरकत नोंदविता येणार आहे.

३१ ऑगस्ट ते ३० सप्टेंबर २०२६ या कालावधीत मतदार नोंदणी अधिकारी व सहाय्यक मतदार नोंदणी अधिकारी यांच्याकडे दावे-हरकती स्वीकारल्या जाणार आहेत. त्यानंतर ३१ ऑगस्ट ते २९ ऑक्टोबर या कालावधीत त्यावर निर्णय घेण्यात येऊन ४ नोव्हेंबर २०२६ रोजी अंतिम मतदारयादी प्रसिद्ध करण्यात येणार आहे.

198 शिरुर विधानसभा मतदार संघाची प्रारूप मतदार यादी मतदार नोंदणी अधिकारी व सहाय्यक मतदार नोंदणी अधिकारी यांचे कार्यालयात पाहणी करीता उपलब्ध असल्याची माहिती

 मतदार नोंदणी अधिकारी, १९८ शिरुर विधानसभा मतदार संघ तथा उपजिल्हाधिकारी संगीता राजापूरकर यांनी दिली.