गणेशोत्सवात डीजे, लेसरला बंदी; ध्वनिमर्यादा भंग करणाऱ्यांवर कारवाईचा इशारा

शिरूर { डेली न्यूज पोस्ट टीम 24}: आगामी गणेशोत्सवाच्या पार्श्वभूमीवर ध्वनिक्षेपकाचा वापर करताना शासनाने निश्चित केलेल्या ध्वनिमर्यादेचे काटेकोर पालन करावे. ध्वनिप्रदूषण करणाऱ्या तसेच डीजे, प्लाझा व लेसरचा वापर करणाऱ्यांवर कायदेशीर कारवाई करण्यात येईल, असा इशारा शिरूर पोलीस निरीक्षक विनोद पाटील यांनी दिला.

शिरूर पोलीस ठाण्यात सार्वजनिक गणेश मंडळांच्या कार्यकर्त्यांची गणेशोत्सवाच्या नियोजनासंदर्भात बैठक घेण्यात आली. यावेळी पोलीस निरीक्षक विनोद पाटील, नगराध्यक्षा ऐश्वर्या अभिजित पाचर्णे, उपनगराध्यक्ष मितेश गादिया, मुख्याधिकारी प्रीतम पाटील,कार्यालयीन अधीक्षक राहुल पिसाळ, नगरपरिषद सभापती सुनील जाधव, एजाज बागवान, नगरसेवक सागर नरवडे, नगरसेविका सुनीता भुजबळ, यांच्यासह गणेश मंडळांचे पदाधिकारी व कार्यकर्ते उपस्थित होते.

पोलीस निरीक्षक पाटील म्हणाले, गणेशोत्सव काळात शिरूर पोलिसांची दोन विशेष पथके कार्यरत राहणार आहेत. यातील एक पथक मिरवणुकीच्या मार्गावर गणेश मंडळांची मिरवणूक सुरळीतपणे पुढे जाईल यावर लक्ष ठेवणार आहे, तर दुसरे पथक ध्वनिक्षेपक व ध्वनिप्रदूषणाच्या नियमांचे पालन होते की नाही, यावर लक्ष ठेवणार आहे.

गणेश मंडळांनी उत्सवासाठी आवश्यक त्या सर्व शासकीय विभागांच्या परवानग्या घ्याव्यात. मंडप उभारताना सार्वजनिक वाहतुकीला अडथळा होणार नाही, याची दक्षता घ्यावी. मिरवणुकीमध्ये आक्षेपार्ह फलक झळकावू नयेत. तसेच सोशल मीडियावर आक्षेपार्ह व्हिडिओ अथवा समाजात तेढ निर्माण करणाऱ्या पोस्ट प्रसारित करू नयेत, असे आवाहन पाटील यांनी केले. मंडपांमध्ये सीसीटीव्ही कॅमेरे बसविण्याचे आवाहनही त्यांनी केले.विसर्जन मिरवणुकीदरम्यान वीजपुरवठ्याच्या तारा अथवा अन्य विद्युत अडथळ्यांमुळे धोका निर्माण होणार नाही, याची संबंधित विभागाने दक्षता घ्यावी, अशी सूचना करण्यात आली. गणेश मंडळांनी वर्गणीची सक्ती करू नये तसेच पर्यावरणपूरक गणेशोत्सव साजरा करावा, असेही बैठकीत सांगण्यात आले.

नगराध्यक्षा ऐश्वर्या पाचर्णे यांनी गणेशोत्सव उत्साहात आणि शांततेत साजरा करताना शासनाच्या नियमांचे पालन करण्याचे आवाहन केले.शिरूर नगरपरिषदच्या वतीने रस्त्याची दुरुस्ती करण्या बरोबरच पर्यावरण पूरक गणेशोत्सव साजरा करणारा मंडळाचा विशेष सन्मान करण्यात येणार असल्याचे त्यांनी सांगितले.

एक खिडकी योजनेची मागणी

बैठकीत गणेश मंडळांच्या पदाधिकाऱ्यांनी विविध सूचना मांडल्या. गणेश मंडळांना विविध परवानग्या घेण्यासाठी एक खिडकी योजना सुरू करावी, विसर्जन मिरवणुकीच्या मार्गावरील अडथळे दूर करावेत, रामलिंग रोडवरील गणेश मंडळांच्या विसर्जन मिरवणुकीवेळी वाहतूक पर्यायी मार्गाने वळवावी, अशा मागण्या करण्यात आल्या. तसेच रात्री १२ नंतर विसर्जन मिरवणुकीत पारंपरिक वाद्यांना परवानगी देण्याची मागणीही करण्यात आली.

यावेळी उपनगराध्यक्ष मितेश गदिया, सभापती सुनील जाधव, अभिजित आंबेकर, मुकुंद ढोबळे, बापू सानप, महिबूब सय्यद, डॉ. वैशाली साखरे आदींनी विविध सूचना मांडल्या.आभार सहाय्यक पोलीस निरीक्षक दिवटे यांनी मानले.