नऊ नवदुर्गांच्या कर्तृत्वाचा गुरवार दिनांक २९ ऑक्टोबर रोजी शिरूर येथे गौरव!

शिरूर { डेली न्यूज पोस्ट टीम 24}जिद्द, चिकाटी, संघर्ष आणि आत्मविश्वासाच्या बळावर प्रतिकूल परिस्थितीवर मात करत समाजात स्वतःची वेगळी ओळख निर्माण करणाऱ्या शिरूर परिसरातील नऊ कर्तृत्ववान महिलांच्या कार्याचा गौरव गुरुवारी (दि. २९) ‘नवदुर्गा सन्मान २०२६’ पुरस्काराने करण्यात येणार आहे. नवरात्रीच्या नऊ दिवसांत आपल्या कार्यातून समाजाला प्रेरणा देणाऱ्या या नवदुर्गांच्या प्रवासाची ओळख करून देणाऱ्या ‘डेली न्यूज पोस्ट २४’च्या उपक्रमाचा हा सन्मान सोहळा गुरुवारी सायंकाळी चार वाजता बाबुरावनगर येथील डेक्कन एज्युकेशन इंग्लिश मीडियम व सेमी इंग्लिश मीडियम स्कूलमध्ये होणार आहे.

स्वतःच्या कर्तृत्वाने अनेकांसाठी आशेचा किरण बनलेल्या या महिलांचा गौरव म्हणजे केवळ पुरस्कार वितरण नव्हे, तर संघर्षातून उभ्या राहिलेल्या जिद्दीचा, शिक्षणातून मिळालेल्या सामर्थ्याचा आणि समाजासाठी झटणाऱ्या स्त्रीशक्तीचा सन्मान ठरणार आहे. साहित्य, शिक्षण, ग्रामविकास, उद्योजकता, अभिनय, क्रीडा आणि सामाजिक कार्य अशा विविध क्षेत्रांत उल्लेखनीय योगदान देणाऱ्या या नवदुर्गांच्या यशस्वी वाटचालीला या सोहळ्यात सलाम केला जाणार आहे.

शिरूर पंचायत समितीच्या सभापती स्वाती विठ्ठल घावटे, शिरूरच्या नगराध्यक्षा ऐश्वर्या अभिजित पाचर्णे, नायब तहसीलदार स्नेहा गिरगोसावी, पोलीस निरीक्षक विनोद पाटील, सामाजिक कार्यकर्त्या राणीताई चौरे व उषाताई वाखारे तसेच प्राचार्य डॉ. समीर ओंकार यांच्या प्रमुख उपस्थितीत हा सोहळा पार पडणार आहे. यावेळी शिरूर नगरपालिकेतील विविध विषय समित्यांचे सभापती, नगरसेवक-नगरसेविका तसेच सामाजिक, राजकीय आणि शैक्षणिक क्षेत्रांतील मान्यवर उपस्थित राहणार आहेत.

सावित्रीबाई फुले पुणे विद्यापीठात मराठी विषयात सुवर्णपदक मिळविणाऱ्या प्रा. डॉ. क्रांती पैठणकर, ग्रामविकासासोबत राजकारण आणि उद्योगक्षेत्रात ठसा उमटविणाऱ्या आदर्श सरपंच व उद्योजिका वर्षा काळे, शिक्षण, अभिनय आणि सामाजिक भान यांचा संगम साधणाऱ्या प्राचार्या अश्विनी घारू, वंचितांच्या वेदना साहित्यातून मांडणाऱ्या लेखिका कविता पाचंग्रे, अभिनयाचा वारसा नसतानाही स्वतःच्या मेहनतीने पुढे आलेली अभिनेत्री प्रतीक्षा बारवकर, ग्रामीण भागातून येऊन स्पर्धा परीक्षार्थींच्या स्वप्नांना बळ देणाऱ्या राजमाता जिजाऊ अभ्यासिकेच्या प्रमुख प्रा. अलका बेलोटे (बोरुडे), सामाजिक प्रश्नांवर संघर्ष करत सामान्यांना मदतीचा हात देणाऱ्या जिम ट्रेनर व सामाजिक कार्यकर्त्या प्रिया बिरादार, शिक्षणाच्या माध्यमातून वंचितांच्या आयुष्यात आशेचा दिवा पेटविण्यासाठी झटणाऱ्या सामाजिक कार्यकर्त्या सुनीता भोसले आणि ग्रामीण भागातून क्रिकेटमध्ये स्वतःचे स्थान निर्माण करणारी उदयोन्मुख खेळाडू आरती दसगुडे या नऊ नवदुर्गांचा सन्मान करण्यात येणार आहे.

या सोहळ्यात शौर्य आणि समयसूचकतेचा विशेष गौरवही होणार आहे. शिरूरमधील आनंदनगर वसाहतीत १० ऑक्टोबर रोजी पहाटे एका चोरट्याने छाजेड यांच्या घरात बंदुकीसह प्रवेश केला होता. यावेळी अवघ्या १२ वर्षांच्या मानवी उमेश छाजेड हिने प्रसंगावधान राखत चोरट्याचा प्रतिकार केला आणि वडिलांना मदत केली. संकटाच्या क्षणी दाखविलेल्या या धैर्याची दखल घेत श्रीमंत हलवाई चौक गणेश मित्र मंडळाच्या वतीने मानवीचा विशेष सन्मान करण्यात येणार आहे. चिमुरडीच्या या धाडसातून संकटसमयी वयापेक्षा धैर्य मोठे असते, याचा प्रत्यय आला.

नवरात्रीच्या काळात ‘डेली न्यूज पोस्ट २४’ने या नऊ महिलांचे कार्य आणि संघर्ष समाजासमोर आणले. त्यांच्या यशामागील जिद्द, त्याग आणि सामाजिक बांधिलकी नव्या पिढीसाठी प्रेरणादायी ठरावी, हा या उपक्रमामागील उद्देश आहे. या उपक्रमाचे प्रमुख माध्यम प्रायोजक डेक्कन एज्युकेशन इंग्लिश व सेमी इंग्लिश मीडियम स्कूल, शिरूर हे आहेत.

स्त्रीशक्तीचा सन्मान, कर्तृत्वाचा गौरव आणि नव्या स्वप्नांना प्रेरणा देणाऱ्या या सोहळ्यास नागरिकांनी मोठ्या संख्येने उपस्थित राहावे, असे आवाहन प्रा. सतीश धुमाळ यांनी केले आहे.