संघर्ष, जिद्द आणि कर्तृत्वाचा जागर; ‘डेली न्यूज पोस्ट २४’च्या नवदुर्गा सन्मानाने नऊ स्त्रीशक्तींचा गौरव!

शिरूर { डेली न्यूज पोस्ट टीम 24}प्रत्येक स्त्रीमध्ये असामान्य कर्तृत्व दडलेले असते. परिस्थिती कितीही प्रतिकूल असली, तरी जिद्द, धाडस, संयम आणि आत्मविश्वासाच्या बळावर ती स्वतःची स्वतंत्र ओळख निर्माण करू शकते. कुटुंबाची जबाबदारी सांभाळतानाच विविध क्षेत्रांत प्रामाणिकपणे काम करून समाजासमोर आदर्श निर्माण करणाऱ्या महिलांच्या कार्याची दखल घेत ‘डेली न्यूज पोस्ट २४’ने आयोजित केलेला ‘नवदुर्गा सन्मान २०२६’ हा उपक्रम अत्यंत कौतुकास्पद आणि प्रेरणादायी असल्याचे गौरवोद्गार शिरूरच्या नगराध्यक्षा ऐश्वर्या अभिजित पाचर्णे यांनी काढले.

जिद्द, चिकाटी, संघर्ष आणि आत्मविश्वासाच्या जोरावर प्रतिकूल परिस्थितीवर मात करत साहित्य, शिक्षण, ग्रामविकास, उद्योजकता, अभिनय, क्रीडा आणि सामाजिक कार्य अशा विविध क्षेत्रांत स्वतःचा वेगळा ठसा उमटविणाऱ्या शिरूर परिसरातील नऊ कर्तृत्ववान महिलांचा ‘डेली न्यूज पोस्ट २४’च्या वतीने ‘नवदुर्गा सन्मान २०२६’ पुरस्काराने गौरव करण्यात आला. नवरात्रीच्या नऊ दिवसांत समाजाला आपल्या कार्यातून प्रेरणा देणाऱ्या या नवदुर्गांच्या संघर्षमय आणि प्रेरणादायी प्रवासाची ओळख समाजासमोर आणणाऱ्या या उपक्रमाचा सन्मान सोहळा बाबुरावनगर येथील डेक्कन एज्युकेशन इंग्लिश व सेमी इंग्लिश मीडियम स्कूलमध्ये उत्साहपूर्ण वातावरणात पार पडला.

हा सोहळा केवळ पुरस्कार वितरणाचा नव्हता, तर परिस्थितीशी दोन हात करून स्वतःचे अस्तित्व निर्माण करणाऱ्या स्त्रीशक्तीच्या जिद्दीला सलाम करणारा होता. कोणाच्या वाट्याला संघर्ष आला, कोणाला परिस्थितीशी झुंज द्यावी लागली, तर कोणाला आपल्या स्वप्नांसाठी सातत्याने मेहनत घ्यावी लागली. मात्र, अडचणींना संधी मानून पुढे जाण्याच्या वृत्तीने या महिलांनी आपल्या कार्याचा स्वतंत्र ठसा उमटविला. त्यांच्या कर्तृत्वाचा गौरव करताना उपस्थितांनी टाळ्यांच्या गजरात त्यांचे अभिनंदन केले.

या सोहळ्यास शिरूर पंचायत समितीच्या सभापती स्वाती विठ्ठल घावटे, नगराध्यक्षा ऐश्वर्या अभिजित पाचर्णे, शिरूर नगरपरिषदेच्या महिला व बालकल्याण समितीच्या सभापती आयेशा सय्यद, पोलीस उपनिरीक्षक सीमा काळे, सामाजिक कार्यकर्त्या राणीताई चौरे, उषाताई वाखारे, नगरसेवक संतोष थेऊरकर, उमेश शेळके, शिरूर शहर विकास आघाडीचे अध्यक्ष अॅड. सुभाष पवार, प्राचार्य डॉ. समीर ओंकार, नोटरी दिलीप वारे, महात्मा फुले राहुरी कृषी विद्यापीठाचे सेवानिवृत्त प्रा. डॉ. दीपक गायकवाड, शिरूर नगरपरिषद शिक्षण मंडळाचे माजी सभापती अॅड. प्रदीप बारवकर, हेलिंग लाईव्हचे राज्यप्रमुख संतोष सांबारे, जैन युवा परिषद घोडनदीचे प्रकाश बाफना, प्राचार्य डॉ. अमोल शहा, मनसेचे जिल्हा उपाध्यक्ष महिबूब सय्यद, शासनाचा कृषिनिष्ठ पुरस्कार प्राप्त शेतकरी नितीन थोरात, अखिल भारतीय मराठा महासंघाचे तालुकाध्यक्ष श्यामकांत वर्पे, तर्डोबावाडीचे उपसरपंच गणेश खोले, मुख्याध्यापक विनायक म्हसवडे, भूमिपुत्र प्रतिष्ठानचे अध्यक्ष सुशांत कुटे, मातोश्री प्रतिष्ठानचे अध्यक्ष अभिजित आंबेकर, भाजप अल्पसंख्याक आघाडीचे राजू शेख, अविष्कार संघटनेचे जिल्हाध्यक्ष प्रा. विलास आंबेकर, एस.टी. कामगार संघटनेचे नेते माधव मुंडे, काँग्रेसचे नेते अजिमभाई सय्यद, ग्राहक पंचायतीचे प्रवीण मुथा, अतुल बोथरा, विनोद बोथरा, रणजित गायकवाड, अशोक काळे, सिकंदर मण्यार, गोपीनाथ पठारे, अशोक भोसले, व्यावसायिक प्रमोद वाघचौरे, राष्ट्रीय स्वयंसेवक संघाचे हरी शर्मा, सामाजिक कार्यकर्त्या डॉ. वैशाली साखरे, उर्मिला बारवकर, बाळासाहेब दसगुडे आदी उपस्थित होते.

पत्रकार धर्मा मैड, फिरोज शिकलगार, संजय तंटक, अपर्णा वाळसे, योगिता तंटक, प्रिया देसाई, अरुणा कुलकर्णी, वैशाली जोशी, सायली पटवर्धन, सृष्टी करंजुले, रोहिणी बढे, जयश्री थिटे, अमोल वाघमारे, लहू धारजे, सुनीता सरोदे, अश्विनी पिंगळे, मोनाली जाधव आणि प्रतिभा सोनवणे यांच्यासह सामाजिक, राजकीय, शैक्षणिक आणि विविध क्षेत्रांतील मान्यवरांची उपस्थिती होती.

सावित्रीबाई फुले पुणे विद्यापीठात मराठी विषयात सुवर्णपदक मिळविणाऱ्या प्रा. डॉ. क्रांती पैठणकर यांनी शैक्षणिक क्षेत्रातील यशातून बुद्धिमत्ता आणि परिश्रमाची ताकद अधोरेखित केली आहे. ग्रामविकासाची धुरा सांभाळतानाच राजकारण आणि उद्योजकतेत स्वतःचे स्थान निर्माण करणाऱ्या आदर्श सरपंच वर्षा काळे यांनी ग्रामीण नेतृत्वाचा आदर्श उभा केला आहे.

शिक्षण, अभिनय आणि सामाजिक भान यांचा सुंदर संगम साधणाऱ्या प्राचार्या अश्विनी घारू यांनी शैक्षणिक क्षेत्रात आपली वेगळी ओळख निर्माण केली आहे. वंचितांच्या वेदना आणि समाजातील वास्तव आपल्या लेखणीतून मांडणाऱ्या लेखिका कविता पाचंग्रे यांनी साहित्य क्षेत्रात योगदान दिले आहे. अभिनयाचा कोणताही वारसा नसताना स्वतःच्या मेहनतीच्या जोरावर अभिनय क्षेत्रात वाटचाल करणाऱ्या अभिनेत्री प्रतीक्षा बारवकर यांनी स्वप्नपूर्तीचा प्रेरणादायी प्रवास घडविला आहे.

ग्रामीण भागातून पुढे येत स्पर्धा परीक्षांची तयारी करणाऱ्या विद्यार्थ्यांच्या स्वप्नांना बळ देणाऱ्या राजमाता जिजाऊ अभ्यासिकेच्या प्रमुख प्रा. अलका बेलोटे (बोरुडे) या ज्ञानदानाच्या कार्यातून अनेक विद्यार्थ्यांसाठी प्रेरणास्थान ठरल्या आहेत. सामाजिक प्रश्नांवर सातत्याने आवाज उठवत सामान्य नागरिकांना मदतीचा हात देणाऱ्या जिम ट्रेनर आणि सामाजिक कार्यकर्त्या प्रिया बिरादार यांनी सामाजिक बांधिलकी जपली आहे. शिक्षणाच्या माध्यमातून वंचितांच्या आयुष्यात आशेचा दिवा पेटविण्यासाठी झटणाऱ्या सामाजिक कार्यकर्त्या सुनीता भोसले यांनी सेवाभावाचा आदर्श निर्माण केला आहे. तर ग्रामीण भागातून क्रिकेटमध्ये स्वतःचे स्थान निर्माण करणाऱ्या उदयोन्मुख खेळाडू आरती दसगुडे यांनी क्रीडा क्षेत्रात उल्लेखनीय कामगिरी करत ग्रामीण मुलींसमोर नवा आदर्श ठेवला आहे.

या नऊ महिलांचा सन्मान म्हणजे त्यांच्या वैयक्तिक यशाचा गौरव असला, तरी त्याचबरोबर ग्रामीण भागातील असंख्य महिलांच्या स्वप्नांना मिळालेली नवी उमेद आणि त्यांच्या कर्तृत्वावर व्यक्त केलेला विश्वास असल्याची भावना यावेळी व्यक्त करण्यात आली.

या सोहळ्याचे आणखी एक भावनिक आकर्षण ठरले ते अवघ्या १२ वर्षांच्या मानवी उमेश छाजेड हिच्या शौर्याचा विशेष गौरव. शिरूरमधील आनंदनगर वसाहतीत चोरट्याने बंदुकीसह छाजेड यांच्या घरात प्रवेश केला असताना मानवीने प्रसंगावधान राखत चोरट्याचा प्रतिकार केला आणि वडिलांना मदत केली. तिच्या धाडसामुळे चोरट्याला तेथून पळ काढावा लागला होता. संकटाच्या क्षणी न डगमगता दाखविलेल्या या धैर्याची दखल घेत श्रीमंत हलवाई चौक गणेश मित्र मंडळाच्या वतीने मानवीचा विशेष सन्मान करण्यात आला. तिच्या धाडसाने उपस्थितांची मने जिंकली. वय लहान असले, तरी प्रसंगावधान, धैर्य आणि आत्मविश्वास किती मोठा असू शकतो, याची जाणीव या चिमुरडीने करून दिली.

नगराध्यक्षा ऐश्वर्या पाचर्णे म्हणाल्या की, शिरूर परिसरात महिला विविध क्षेत्रांत उल्लेखनीय काम करीत आहेत. त्या आपल्या कुटुंबाची जबाबदारी समर्थपणे पार पाडतानाच कार्यक्षेत्रातही प्रामाणिकपणे योगदान देत आहेत. अशा महिलांच्या कर्तृत्वाची दखल घेऊन त्यांना सन्मानित करण्याचे काम ‘डेली न्यूज पोस्ट २४’ने केले आहे. या उपक्रमामुळे महिलांना प्रोत्साहन मिळेलच, शिवाय नव्या पिढीलाही काहीतरी वेगळे करण्याची प्रेरणा मिळेल.

यावेळी पंचायत समितीच्या सभापती स्वाती घावटे, शिरूर शहर विकास आघाडीचे अध्यक्ष अॅड. सुभाष पवार, पुरस्कारार्थी प्रा. अलका बेलोटे, सुनीता भोसले, सामाजिक कार्यकर्त्या राणीताई चौरे, प्राचार्या अश्विनी घारू आणि प्राचार्य डॉ. समीर ओंकार यांनी मनोगते व्यक्त केली. त्यांनी ‘डेली न्यूज पोस्ट २४’च्या या उपक्रमाचे कौतुक करत कर्तृत्ववान महिलांना मिळालेल्या सन्मानाचे महत्त्व अधोरेखित केले.

कार्यक्रमाचे प्रास्ताविक करताना प्रा. सतीश धुमाळ यांनी या उपक्रमामागील भूमिका स्पष्ट केली. ते म्हणाले की, नवरात्रीच्या नऊ दिवसांत ‘डेली न्यूज पोस्ट २४’च्या माध्यमातून या नऊ महिलांचे कार्य, संघर्ष आणि यशस्वी वाटचाल समाजासमोर आणण्यात आली. त्यांच्या यशामागील जिद्द, त्याग, परिश्रम आणि सामाजिक बांधिलकी नव्या पिढीला प्रेरणा देणारी आहे. समाजात अनेक महिला निःस्वार्थपणे आणि निष्ठेने काम करीत असतात; मात्र त्यांच्या कार्याची पुरेशी दखल घेतली जात नाही. अशा महिलांना व्यासपीठ मिळवून देणे, त्यांच्या कर्तृत्वाची समाजाला ओळख करून देणे आणि इतर महिलांनाही पुढे जाण्याची प्रेरणा देणे, हा या उपक्रमाचा मुख्य उद्देश आहे.

या उपक्रमाचे प्रमुख माध्यम प्रयोजक म्हणून डेक्कन एज्युकेशन इंग्लिश व सेमी इंग्लिश मीडियम स्कूल, बाबुरावनगर, शिरूर यांनी सहकार्य केले. स्त्रीशक्तीचा सन्मान, कर्तृत्वाचा गौरव आणि नव्या स्वप्नांना प्रेरणा देणारा हा सोहळा असल्याचेही प्रा. धुमाळ यांनी सांगितले.

कार्यक्रमाचे सूत्रसंचालन जयश्री दांडगे यांनी केले, तर आभार माजी सरपंच वर्षा काळे यांनी मानले. संगीता कुलवंत यांनी पसायदान कार्यक्रमाच्या शेवटी म्हटले.

एका पुरस्काराने संघर्ष संपत नाही; मात्र त्या संघर्षाला समाजाची दाद मिळते, कर्तृत्वाला नवी ओळख मिळते आणि पुढील वाटचालीसाठी नवे बळ मिळते. ‘डेली न्यूज पोस्ट २४’च्या नवदुर्गा सन्मान सोहळ्याने हाच सकारात्मक संदेश दिला. नऊ महिलांच्या नऊ प्रेरणादायी प्रवासातून शिरूरच्या स्त्रीशक्तीचे सामर्थ्य अधोरेखित झाले. या सन्मानाने केवळ नऊ महिलांचा गौरव झाला नाही, तर समाजातील प्रत्येक स्त्रीच्या स्वप्नांना, जिद्दीला आणि कर्तृत्वाला नवी ऊर्जा देण्याचे काम केले.

कर्तृत्वाला सलाम, जिद्दीला मान; स्त्रीशक्तीने उजळला समाजाचा अभिमान!