मोकाट कुत्र्यांचा उच्छाद . कुत्र्याच्या हल्ल्यात सहा वर्षाचा मुलगा जखमी .मागील काही दिवसात १७ जणांना घेतला चावा

शिरुर, दिनांक २५ (डेली न्युज पोस्ट टीम-24) — शिरुर शहरातील गुजर कॉलनी परिसरात मोकाट व पिसाळलेल्या कुत्र्यांनी नागरिकांचे जीवन अक्षरशः हैराण केले आहे. काल, २५ मे रोजी, दोन पिसाळलेल्या कुत्र्यांनी खेळत असलेल्या सहा वर्षीय ईशांत राजेंद्र दारोळे याच्यावर हल्ला करत चावा घेतला. त्याला जखमी अवस्थेत अहिल्यानगर येथील रुग्णालयात उपचारासाठी दाखल करण्यात आले आहे .
गेल्या दोन-अडीच वर्षांपासून या परिसरात दोन कुत्र्यांनी उच्छाद मांडला असून आत्तापर्यंत १७ पेक्षा अधिक लहान मुले आणि ज्येष्ठ नागरिक यांना चावा घेतल्याची माहिती समोर आली आहे. त्यामुळे परिसरात भीतीचे वातावरण आहे.
या घटनेनंतर संतप्त महिलांनी एकत्र येऊन मोकाट कुत्र्यांच्या बंदोबस्ताची मागणी नगरपरिषद प्रशासनाकडे केली आहे. यावेळी शिरूर नगर परिषदेचे माजी सभापती विठ्ठलराव पवार, सविता वाबळे, संध्या दारोळे , सविता बोरुडे छाया यादव ,धनश्री मच्छिंद्र कदम, नंदा संतोष नवले, राजश्री रोकडे, सिंधू सोमनाथ पळसकर, पूजा भास्कर हरिहर , प्रीती प्रकाश बनसोडे ,पूजा भोंडवे ,सुप्रिया गावडे ,रश्मी जगदाळे, नितीन यादव ,आशिष पळसकर, दत्तात्रय शेलार, महेश कुरंदळे, महेश पठारे ,सुहास वाबळे आदी उपस्थित होते.
सविता , दारोळे म्हणाल्या की माझा भाचा ईशांत हा काल घराबाहेर खेळत असताना दोन पिसाळलेली कुत्री आली व त्यांनी ईशांतचा चावा घेतला .यामुळे तो जखमी झाला असून त्याच्यावर अहिल्यानगर येथे उपचार सुरू आहेत. पालिका प्रशासनाने मोकाट कुत्र्यावर आळा घातल्या पाहिजे. मागील काही वर्षांपूर्वी पालिकेने कुत्र्यांची नसबंदी केली. तरी पण मोकाट कुत्र्यांच्या संख्या वाढत आहे. मुले घराबाहेर सुरक्षितपणे खेळू शकत नाही . ग्रामीण रुग्णालयात लस ही उपलब्ध होत नाही ही लस उपलब्ध व्हावी असे त्या म्हणाल्या .
सविता वाबळे यांनी सांगितले की काही दिवसापूर्वी माझ्या ही मुलाला कुत्र्याने चावा घेतला होता. मोकाट व अनिर्बंध कुत्र्यांच्या संख्येमुळे मुले घराबाहेर येऊ शकत नाहीत .कुत्र्यांचा बंदोबस्त तातडीने केला पाहिजे .
सविता भोंडवे यांनी सांगितलं की माझ्याही मुलाला काही दिवसापूर्वी कुत्र्याने चावा घेतला होता .वारंवार गुजर कॉलनी परिसरातील मोकाट कुत्रे मुलांना व जेष्ठ नागरिकांना चावे घेतात याबाबत नगरपरिषद गांभीर्याने उपाययोजना करावी .
शिरुर नगर परिषदेचे माजी सभापती विठ्ठलराव पवार यांनी सांगितले की गुजर मळा परिसरात गेल्या काही दिवसापासून १७ जणांना कुत्र्यानी चावा घेतला आहे. गुजर कॉलनी परिसरातील एक काळ्या रंगाचे व एक पांढऱ्या रंगाचे अशी दोन पिसाळलेली कुत्रे ही लहान मुले व ज्येष्ठ नागरिकांना चावतात .या कुत्र्यांच्यामुळे कोणाच्या बळी गेल्यास त्यास प्रशासन जबाबदार राहील असा इशारा त्यांनी दिला .

मोकाट कुत्र्यांच्या उच्छादामुळे जेष्ठ नागरिक व लहान मुले यांना घराबाहेर पडणे अवघड झाले आहे. पालिकेने यावर तातडीने उपाययोजना करावी.
गुजर कॉलनीतील देवांश पळसकर वय -६ याला दोन वर्षात तीन वेळा कुत्रे चावले .तर श्रेयस पोटे , महादेव चव्हाण , शंभूराजे शेलार , वंश वाबळे , ईशा रावडे , संदेश भोंडवे , मयूरेश कदम , आयुष हरिहर ,दरेकर आजोबा ( वय -८० ) गौरव गिरमकर ,यांनाही काही दिवसापूर्वी गुजर कॉलनीत कुत्रे चावल्याचे पवार यांनी सांगितले .
याबाबत पालिकेचे स्वच्छता अधिकारी दत्तात्रय बर्गे यांना प्रतिक्रिया विचारले असता त्यांनी सांगितले की शिरूर शहरातील मोकाट कुत्र्यांवर मागील दोन वर्षापासून कुत्र्याचे निर्बिजीकरण करण्यात येत आहे .गुजर कॉलनी परिसरातील दोन मोकाट कुत्र्यांना पकडण्याचा प्रयत्न पालिकेच्या पथकाने वारंवार केला परंतु ही कुत्री सापडू शकली नाही. यासंदर्भात मुख्याधिकारी प्रीतम पाटील यांना अहवाल सादर करून कारवाई करण्यात येणार आहे.
मागील काही वर्षापासून शिरुर शहर व उपनगरात भटक्या कुत्र्यांची संख्या व वावर मोठ्या प्रमाणावर वाढला आहे .शहरातील विविध भागात
मोठ्या संख्येने असणारी कुत्रे हे रात्रीच्या वेळी पहाटेच्या वेळेस पायी चालणारे व दुचाकीस्वार ,लहान मुले ,ज्येष्ठ नागरिक यांच्यावर भुंकतात व मागे लागतात .अनेकदा घाबरलेले ज्येष्ठ नागरिक लहान मुले याना ही कुत्रे चावे
घेतात व जखमी करतात . तर दुचाकीस्वारी चालकांच्या मागे ही कुत्रे धावतात त्यामुळे गाडी चालविणा- या दुचाकीस्वाराची तारांबळ उडते. त्यामुळे गाडीचालकाचे गाडीवरील नियंत्रण जाते व त्यातुन छोटे अपघात होतात विशेषत : पहाटेच्या वेळी ज्येष्ठ नागरिकांसह अनेक व्यायामप्रेमी फिरण्यासाठी बाहेर पडतात. त्याना ही हा मोकाट व भटक्या कुत्र्याच्या त्रास होत असतो. त्याखेरीज रात्री उशिरा कामावरुन परतणारे याना ही या भटक्या कुत्र्याच्या त्रास होत असतो .
शहरातील भटक्या कुत्र्याची वाढती संख्या लक्षात घेता त्यावर उपाय योजना करणे गरजेचे आहे मोठ्या संख्येने रस्त्यावर फिरणारी कुत्रे ही अनेकाच्या मनात धडकी भरवितात . दिवसेदिवस शहरातील भटक्या कुत्र्याची संख्या वाढत आहे . भटक्या व मोकाट कुत्र्यांच्या संख्येवर वेळीच नियंत्रण न ठेवल्यास कुत्र्याच्या संख्येत मोठी वाढ होवून रस्त्यावरुन सुरक्षित जा ये करणे जिकरीचे होईल. ही वेळ येण्यापूर्वी उपाय होतील अशी अपेक्षा नागरिकांकडून व्यक्त केली जात आहे .