अनाथांसोबत साजरी झाली दिवाळी

शिरूर { डेली न्यूज पोस्ट टीम -24}समाजातील वंचित घटकांनाही दिवाळीचा आनंद अनुभवता यावा, या हेतूने स्व. यशवंतराव चव्हाण सामाजिक व शैक्षणिक प्रतिष्ठान आणि डंबेनाला गणेश मित्र मंडळ यांच्या वतीने यंदाही ‘दिवाळी अनाथांसोबत’ हा उपक्रम उत्साहात राबविण्यात आला. गेल्या काही वर्षांपासून सातत्याने पार पडणाऱ्या या उपक्रमास यंदाही समाजातील विविध घटकांकडून उत्स्फूर्त प्रतिसाद लाभला.

द ग्लोबल मदर फाउंडेशन – सिंधुताई सपकाळ आश्रम येथील
अनाथाश्रमातील मुलांना दिवाळीचा गोडवा अनुभवता यावा, यासाठी प्रतिष्ठानतर्फे फराळाचे पदार्थ, शेंगदाणे, तेल, साबण, उटणे, कपडे, फटाके आदी साहित्याचे संकलन करण्यात आले. अनेक नागरिकांनी उपयोगी वस्तूंसह आर्थिक मदत देत या उपक्रमात मोलाचे योगदान दिले. “दुर्बल घटकांनाही आनंदाचा प्रकाश लाभावा, हाच या उपक्रमाचा हेतू आहे,” असे प्रतिष्ठानचे अध्यक्ष संजय बारवकर यांनी सांगितले.
या प्रसंगी महाराष्ट्र राज्य कृतिशील अधिकारी व कर्मचारी संघटनेचे प्रतिनिधी तसेच बाळासाहेब झाडगे, बाबाजी गलांडे, माजी शिक्षण सभापती प्रदीप बारवकर, प्रा. चंद्रकांत धापटे, माधव मुंडे, भारत बेंद्रे, वसंत बेंद्रे, दिलीप गायकवाड, विष्णू संकपाळ, सुनीता हांडे, प्रेरणा बारवकर, प्रतीक्षा बारवकर, उर्मिला बारवकर आदी मान्यवर उपस्थित होते. ढोरमले यांनी संस्थेच्या कार्याचा आढावा घेतला, तर विनय संकपाळ यांनी आभार मानले.
दरम्यान, बालाजी शिक्षण प्रसारक मंडळाचे बालाजी प्राथमिक व माध्यमिक विद्यालय (सेमी इंग्लिश) तर्फेही सामाजिक संवेदनशीलतेचा सुंदर प्रत्यय देणारा उपक्रम राबविण्यात आला. द ग्लोबल मदर फाउंडेशन – सिंधुताई सपकाळ आश्रम येथील मुलांसाठी शाळेतील विद्यार्थी, शिक्षक आणि पालकांनी किराणा सामान, गोडतेल, साबण, शेंगदाणे, साखर, डाळी, उटणे, पोहे आदी वस्तूंचे संकलन करून आश्रमात भेट दिली.
या उपक्रमात मंडळाचे अध्यक्ष सदाशिव पवार, स्थानिक सल्लागार प्रविण गायकवाड, मुख्याध्यापक विनायक म्हसवडे, उपमुख्याध्यापिका स्वाती चत्तर, शिक्षक–पालक संघाचे उपाध्यक्ष वसंत गव्हाणे, तसेच शिक्षक, कर्मचारी व विद्यार्थी मोठ्या उत्साहाने सहभागी झाले. “थेंबे थेंबे तळे साचे” या म्हणीप्रमाणे सर्वांनी एकत्रित योगदान देत आश्रमातील मुलांच्या चेहऱ्यावर आनंद फुलविला.
कार्यक्रमाचे सूत्रसंचालन ललिता पोंदे यांनी केले. विद्यार्थ्यांनी दाखविलेल्या सामाजिक बांधिलकीचे आणि संवेदनशीलतेचे सर्वत्र कौतुक होत असून, दिवाळीच्या या प्रकाशात मानवतेचा खरा उजेड झळकताना दिसला.

पांडुरंगआण्णा थोरात माध्यमिक विद्यालय, आमदाबाद यांच्या वतीने शिरूर आगारातील एस.टी. विभागातील अधिकारी व कर्मचाऱ्यांचा मिठाई देऊन सन्मान करण्यात आला. दिवाळीच्या पार्श्वभूमीवर आयोजित या उपक्रमात शाळेच्या प्रतिनिधींनी प्रत्यक्ष डेपोत भेट देऊन सुमारे २५ अधिकारी व कर्मचाऱ्यांना शुभेच्छा दिल्या.

विद्यालयातील अनेक विद्यार्थी दररोज शिक्षकांसह एस.टी. बसने प्रवास करतात. या कामी शिरूर आगारातील अधिकारी आणि कर्मचाऱ्यांचे सातत्याने सहकार्य लाभत असल्याचे शाळेच्या मुख्याध्यापिका सौ. स्वातीताई थोरात यांनी सांगितले. शिरूर आगाराचे उत्तम नियोजन आणि शिस्तबद्ध कार्यपद्धतीमुळे विद्यार्थ्यांचा प्रवास सुरक्षित व आनंददायी होत असल्याचे त्या म्हणाल्या.
दरवर्षीप्रमाणे यंदाही प्रथम सत्राच्या शेवटच्या दिवशी शाळेकडून मिठाईचे बॉक्स देऊन अधिकारी व कर्मचाऱ्यांचा सन्मान करण्यात आला. या वेळी आगार व्यवस्थापक सौ. मनिषा गायकवाड, श्री. दळवी, वाहतूक निरीक्षक श्री. सचिन लोहकरे, श्री. उत्तम गायकवाड, श्री. लांडे, श्री. फलके आदी अधिकारी तसेच ड्रायव्हर-कंडक्टर कर्मचारी यांना प्रतीकात्मक स्वरूपात शुभेच्छा देण्यात आल्या.
या प्रसंगी आमदाबादचे आदर्श सरपंच मा. प्रकाशराव थोरात आणि युवा सामाजिक कार्यकर्ते मुकेश (भैया) पाचर्णे प्रमुख पाहुणे म्हणून उपस्थित होते. विद्यालयाचे शिक्षक व कर्मचारी — श्री. पोंदे, श्री. पोटे, श्री. दासिमे, श्री. शिंदे, श्रीमती कोरडे, सौ. ढेंगळे, श्री. शरद येवले आणि श्री. महेश कारकूड — यांनी या उपक्रमात सहभाग घेतला.
एस.टी. डेपोतील अधिकारी व कर्मचाऱ्यांसोबत दिवाळी साजरी करताना सर्वांच्या चेहऱ्यावर समाधान आणि आनंद झळकत होता. विद्यालयाच्या या उपक्रमाचे समाजातील विविध स्तरांतून कौतुक होत आहे.