माझी आई माझ्या कॉलेजात… ‘तू आहेस ना’ म्हणणारी मायेची साद गुरुवार दिनांक २२ जानेवारी रोजी शिरूर च्या बोरा महाविद्यालयात.

शिरूर { डेली न्यूज पोस्ट टीम 24}आई… शब्द छोटा, पण अर्थ अथांग. संघर्ष, त्याग आणि मायेचा अखंड झरा असलेली आई जेव्हा व्यासपीठावरून थेट विद्यार्थ्यांशी संवाद साधते, तेव्हा तो क्षण केवळ कार्यक्रम राहत नाही, तर पिढ्यांना जोडणारा अनुभव ठरतो. अशीच भावस्पर्शी अनुभूती शिरूर येथील चांदमल ताराचंद बोरा कला, वाणिज्य आणि विज्ञान महाविद्यालयात येत्या गुरुवारी 22 जानेवारी रोजी अनुभवायला मिळणार आहे.

शिरूर शिक्षण प्रसारक मंडळाच्या बोरा महाविद्यालयातील विद्यार्थिनी मंच आयोजित “माझी आई माझ्या कॉलेजात – ‘तू आहेस ना’” या मुक्त संवाद कार्यक्रमातून आईच्या मायेची, आधाराची आणि धैर्य देणाऱ्या शब्दांची साद विद्यार्थ्यांपर्यंत पोहोचणार आहे. समाजसेविका अनाथाची माय सिंधुताईं सपकाळ यांचा वारसा पुढे नेणाऱ्या प्रख्यात कवयित्री, गजलकार आणि सामाजिक कार्यकर्त्या ममता सिंधुताई सपकाळ प्रमुख पाहुण्या म्हणून उपस्थित राहणार आहेत. त्यांच्या अनुभवांच्या ओघातून उलगडणारा आईपणाचा अर्थ, संघर्षातून उभे राहण्याची ताकद आणि ‘कोणी तरी आपल्या पाठीशी आहे’ ही जाणीव विद्यार्थ्यांच्या मनात नवी उमेद पेरणार आहे.

आजच्या धावपळीच्या आयुष्यात नात्यांवर पडणारा ताण, तरुणाईतील अस्वस्थता आणि आत्मविश्वासाचा शोध—या साऱ्यांवर आई हा शब्द औषध ठरतो. ‘तू आहेस ना’ या साध्या पण हृदयस्पर्शी आश्वासनातून विद्यार्थ्यांना आधार देणारी, मन उलगडणारी आणि पुढे जाण्याची ऊर्जा देणारी ही भेट ठरणार आहे.

कार्यक्रमाचे उद्घाटन शि.शि.प्रसारक मंडळाचे सचिव नंदकुमार निकम यांच्या हस्ते होणार असून अध्यक्षस्थान प्राचार्य डॉ. के. सी. मोहिते भूषवणार आहेत. विद्यार्थिनी मंचाच्या समन्वयक डॉ. क्रांती पैठणकर यांच्या मार्गदर्शनाखाली हा उपक्रम साकारत आहे.आईच्या मायेची उब, शब्दांतून झिरपणारी संवेदना आणि जीवनाला दिशा देणारा संवाद—या तिन्हींचा संगम असलेला हा कार्यक्रम विद्यार्थ्यांसाठी व मातांसाठी आठवणींचा ठेवा ठरेल, अशी भावना महाविद्यालय परिसरात व्यक्त होत असून मोठया संख्येने विद्यार्थिनी व मातांनी या कार्यक्रमास उपस्थित राहावे असे आवाहन प्राचार्य मोहिते यांनी केले आहे