शिरूर {डेली न्यूज पोस्ट टीम 24}: उदमांजर व मऊ पाठीचे कासव यांची शिकार केल्याप्रकरणी जुन्नर वन विभागाने कारवाई करत एका आरोपीस अटक केली आहे. आरोपीस न्यायालयाने दोन दिवसांची कोठडी सुनावली आहे.
वनपरिक्षेत्र अधिकारी, शिरूर यांना २२ फेब्रुवारी २०२६ रोजी उदमांजर व मऊ पाठीचे कासव यांची शिकार करून संबंधित इसम फरार होत असल्याची माहिती मिळाली. त्यानुसार वनपरिक्षेत्र अधिकारी व अधिनस्त कर्मचाऱ्यांनी तातडीने धाड टाकून लक्ष्मण सखाराम पवार (वय ३९, रा. दुधाडेवाडी, घोटावडे, जि. रायगड) याला ताब्यात घेतले. त्याच्याकडून मेलेले उदमांजर व मऊ पाठीचे कासव तसेच शिकारीसाठी वापरलेले साहित्य जप्त करण्यात आले.
या प्रकरणी वन्यजीव संरक्षण अधिनियम, १९७२ अंतर्गत कलम ९, ३९ व ५१ अन्वये वनपरिमंडळ शिक्रापूर राउंड येथे गुन्हा क्र. व.प्रा. ०२/२०२६ दाखल करण्यात आला आहे. आरोपी उदमांजराची शिकार करून पसार होत असल्याची माहिती मिळाल्याने या गुन्ह्यात इतर सहभागींचा शोधही घेतला जात आहे. पुढील तपास वनपरिक्षेत्र अधिकारी, शिरूर करीत आहेत.
आरोपीस २३ फेब्रुवारी २०२६ रोजी प्रथम वर्ग न्यायदंडाधिकारी, शिरूर यांच्या न्यायालयात हजर केले असता न्यायालयाने दोन दिवसांची वनकोठडी सुनावली.
उदमांजर व मऊ पाठीचे कासव हे वन्यजीव संरक्षण अधिनियम, १९७२ च्या अनुसूची-१ मध्ये समाविष्ट असून त्यांची शिकार करणे हा दखलपात्र व अजामिनपात्र गुन्हा आहे. या गुन्ह्यासाठी सात वर्षांपर्यंत कारावास व २५ हजार रुपयांपर्यंत दंडाची तरतूद आहे. अशा प्रकारच्या गुन्ह्यात सहभागी आढळल्यास कठोर कारवाई करण्यात येईल, असा इशारा वन विभागाने दिला आहे.
ही कारवाई वनसंरक्षक अशिष ठाकरे (वनवृत्त, पुणे) व उपवनसंरक्षक प्रशांत खाडे (वनविभाग, जुन्नर) यांच्या मार्गदर्शनाखाली करण्यात आली. सहाय्यक वनसंरक्षक स्मिता राजहंस, वनपरिक्षेत्र अधिकारी निळकंठ गव्हाणे (शिरूर) तसेच वनपाल गौरी हिंगणे, वनरक्षक प्रमोद पाटील, सोपान अनासुने, नारायण राठोड, गणेश झिरपे, जालिंदर सानप आदी कर्मचाऱ्यांनी कारवाईत सहभाग घेतला.
शिरूर {डेली न्यूज पोस्ट टीम 24}: उदमांजर व मऊ पाठीचे कासव यांची शिकार केल्याप्रकरणी जुन्नर वन विभागाने कारवाई करत एका आरोपीस अटक केली आहे. आरोपीस न्यायालयाने दोन दिवसांची कोठडी सुनावली आहे.
