शिरूरमध्ये शिवमहापुराण कथेनिमित्त वाहतुकीत बदल

Óशिरूर {डेली न्यूज पोस्ट टीम, 24}शिवमहापुराण कथेनिमित्त शिरूर शहरात मोठ्या प्रमाणावर भाविकांची गर्दी अपेक्षित असल्याने २४ फेब्रुवारी २०२६ ते २ मार्च २०२६ या काळावधीत सकाळी १० ते सायंकाळी ६ वाजेपर्यंत सर्व प्रकारच्या वाहनांसाठी पर्यायी मार्गाने वाहतूक वळविण्याचा आदेश जिल्हाधिकारी तथा जिल्हादंडाधिकारी, पुणे यांनी जारी केला आहे.

पंडित प्रदीप मिश्रा यांच्या श्री शिवमहापुराण कथेचे आयोजन पाबळ रोड, शिरूर (राज्य महामार्ग क्र. ५४) येथे होत असून या कार्यक्रमासाठी विविध भागांतून हजारो भाविक येणार आहेत. या पार्श्वभूमीवर वाहतूक कोंडी टाळण्यासाठी हा निर्णय घेण्यात आला आहे.

आदेशानुसार पाबळ रोडवरून रामलिंगकडे जाणारी वाहतूक अग्निशमन केंद्र चौक, शिरूर येथून नवीन नगरपालिकेचा रस्ता, जुना अहमदनगर–पुणे हायवे, बरला आर्ट्स शेजारून बगाड रोडमार्गे वळविण्यात येणार आहे. तसेच रामलिंग ते शिरूरमार्गे पुण्याकडे जाणारी वाहतूक बैलगाडी शर्यत घाट,रामलिंग बगाड रोडमार्गे वळवून जुन्या पुणे–अहिल्यानगर हायवेने शिरूरकडे सोडण्यात येणार आहे.

कार्यक्रमादरम्यान पाबळ रोडवरील वाहने नियोजित ठिकाणी पार्क करून भाविकांना कार्यक्रमस्थळी पायी जावे लागणार आहे. संबंधित आदेश तात्काळ प्रभावाने लागू करण्यात आला असून नागरिकांनी पर्यायी मार्गांचा वापर करून प्रशासनास सहकार्य करावे, असे आवाहन करण्यात आले आहे.