एमडी ड्रग्जसह एक जण जेरबंद; ६.८० लाखांचा मुद्देमाल जप्त

शिरूर { डेली न्यूज पोस्ट टीम 24}अंमली पदार्थांच्या अवैध व्यापारावर मोठी कारवाई करत स्थानिक गुन्हे शाखा आणि रांजणगाव पोलिसांनी ३४ ग्रॅम एमडी (मेफेड्रोन) अंमली पदार्थ जप्त केला असून एका आरोपीला अटक करण्यात आली आहे. जप्त मुद्देमालाची किंमत सुमारे ६ लाख ८० हजार रुपये असल्याची माहिती पोलिसांनी दिली.

भारत सरकारच्या ‘नशामुक्त भारत अभियान’ अंतर्गत अंमली पदार्थांविरोधात कठोर कारवाईचे आदेश देण्यात आले असून, त्यानुसार पुणे ग्रामीण पोलिसांकडून सातत्याने मोहीम राबवली जात आहे. जिल्हा पोलीस अधीक्षक संदीप सिंह गिल यांच्या मार्गदर्शनाखाली ही कारवाई करण्यात आली.

दि. १६ मार्च रोजी सायंकाळी रांजणगाव एमआयडीसी परिसरात गस्त घालत असताना स्थानिक गुन्हे शाखेच्या पथकाला गुप्त माहिती मिळाली की, गणेगाव रोडवरील संकल्प सिटी परिसरात एक व्यक्ती एमडी अंमली पदार्थ विक्रीसाठी येणार आहे. या माहितीच्या आधारे पोलिसांनी सापळा रचत छापा टाकला.

या कारवाईत प्रशांत फक्कड मावळे (वय २४, रा. रांजणगाव, मूळ रा. मलठण ता. शिरूर जि. पुणे ) याला ताब्यात घेण्यात आले. त्याच्याकडून ३४ ग्रॅम एमडी, इलेक्ट्रॉनिक वजन काटा व इतर साहित्य असा एकूण ६.८० लाख रुपयांचा मुद्देमाल जप्त करण्यात आला.

याप्रकरणी पोलीस ठाण्यात एनडीपीएस कायद्यान्वये गुन्हा दाखल करण्यात आला आहे. चौकशीत आरोपीने हा अंमली पदार्थ विकास दातीर (रा. माळीवाडी, सोनगाव, ता. राहुरी) याच्याकडून आणल्याची कबुली दिली असून, त्याचा शोध सुरू आहे.

अटक करण्यात आलेल्या आरोपीस न्यायालयात हजर केले असता २० मार्चपर्यंत पोलीस कोठडी सुनावण्यात आली आहे. पुढील तपास पोलीस करत आहेत.

ही कारवाई पोलीस अधीक्षक संदीप सिंह गिल, अप्पर पोलीस अधीक्षक रमेश चोपडे आणि उपविभागीय पोलीस अधिकारी प्रशांत ढोले यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, पोलीस निरीक्षक महादेव वाघमोडे, स्था. गु.शा.चे सपोनि कुलदीप संकपाळ, पोसई अविनाश थोरात स्था.गु.शा. चे पोलीस अंमलदार तुषार पंदारे, जनार्दन शेळके, संजु जाधव, राजू मोमीन, सागर धुमाळ, राहुल पवार, अंमलदार विलास आंबेकर, किशोर शिवणकर, अमोल रासकर यांनी केली असून सदर गुन्हयाचा पुढील तपास पोलीस सब इन्स्पेक्टर अविनाश थोरात, हे करत आहेत.¯