नगरसेवकांमधूनच उद्याचे सक्षम नेतृत्व घडते – विभागीय संचालक स्थानिक स्वराज्य संस्था नाशिक जीवन सोनवणे

शिरूर { डेली न्यूज पोस्ट 24}शहराच्या सर्वांगीण विकासामध्ये नगरसेवकांची भूमिका अत्यंत महत्त्वाची असून नगरसेवकांमधूनच भविष्यात मोठे आणि सक्षम नेतृत्व घडू शकते. मात्र पालिकेतील कामकाज अधिक प्रभावीपणे राबवायचे असेल तर नगरसेवकांनी विविध कायदे, प्रशासन, विकास प्रक्रिया यांचे सखोल ज्ञान प्रशिक्षणाच्या माध्यमातून घेणे आवश्यक आहे, असे प्रतिपादन विभागीय संचालक, स्थानिक स्वराज्य संस्था तथा माजी महानगरपालिका आयुक्त जीवन सोनवणे यांनी केले.

सन शाईन क्लब, शिरूर यांच्या वतीने शिरूर नगरपरिषदेतील नवनिर्वाचित नगरसेवक व नगराध्यक्षा यांचा सन्मान सोहळा आयोजित करण्यात आला होता. यावेळी ‘स्थानिक स्वराज्य संस्था व लोकप्रतिनिधी’ या विषयावर जीवन सोनवणे यांचे मार्गदर्शनपर व्याख्यान झाले.

या कार्यक्रमास सेवानिवृत्त कर्नल साहेबराव शेळके, महाराष्ट्र लोकसेवा आयोगाचे माजी अध्यक्ष तथा सन शाईन क्लबचे अध्यक्ष किशोर राजे निंबाळकर, नगराध्यक्षा ऐश्वर्या पाचर्णे, भाजपचे तालुकाध्यक्ष राहुल पाचर्णे, माजी सैनिक बाळासाहेब शेवाळे यांच्यासह मान्यवर उपस्थित होते.

सोनवणे पुढे म्हणाले की, नगरसेवक हा अष्टपैलू असावा लागतो. स्थानिक स्वराज्य संस्थांचे कामकाज, विकासात्मक योजना, विविध कायदे, शासनाचा निधी कसा मिळवावा तसेच पालिकेचे उत्पन्न कसे वाढवता येईल, याबाबतचे सखोल मार्गदर्शन प्रशिक्षणाच्या माध्यमातून मिळते. अशा प्रशिक्षणामुळे नगरसेवक अधिक प्रभावीपणे लोकसेवेचे काम करू शकतात. शिरूर नगरपालिकेच्या नगरसेवकांसाठी स्थानिक स्वराज्य संस्था, नाशिक यांच्या वतीने विशेष प्रशिक्षण देण्याची तयारी असल्याचेही त्यांनी स्पष्ट केले.

सेवानिवृत्त कर्नल साहेबराव शेळके यांनी भारतीय सैन्य दलाची माहिती देत युवकांसाठी उपलब्ध असलेल्या रोजगार संधी व सैन्य प्रशासनाबाबत मार्गदर्शन केले.

यावेळी मान्यवरांच्या हस्ते नवनिर्वाचित नगराध्यक्षा ऐश्वर्या पाचर्णे तसेच सभापती सुनील जाधव, सभापती एजाज बागवान, सभापती डॉ. सुनीता पोटे, सभापती स्वाती साठे, सभापती आयेशा सय्यद, उपसभापती स्वप्ननाली जामदार,नगरसेवक सागर नरवडे, निलेश पवार, राजेंद्र लोळगे, निलेश गाडेकर, संतोष थेऊरकर, अमित कर्डीले, उमेश शेळके, दिनेश मांडगे,अमोल चव्हाण, सुनीता कुरुंदळे, सुनीता भुजबळ, स्वीटी शिंदे, रिंकू जगताप, सविता राजापूरे, , चारुशीला कोळपकर, पूजा पोटावळे, सांगिता मल्लाव यांचा सन्मान करण्यात आला. त्याच बरोबर माजी सरपंच शिवाजीराव कदम, ज्ञानदेव देवखिळे, बाळासाहेब शेवाळे, नंदकिशोर रोडे, रावसाहेब आदक यांच्या सन्मान करण्यात आला.

नगराध्यक्षा ऐश्वर्या पाचर्णे यांनी सन्मानाबद्दल कृतज्ञता व्यक्त केली.कार्यक्रमाचे प्रास्ताविक किशोर राजे निंबाळकर यांनी केले. स्वागत बाळासाहेब शेवाळे यांनी केले. सूत्रसंचालन प्रा. सतीश धुमाळ यांनी केले तर आभार संगीता शेवाळे यांनी मानले.