अजातशत्रू नेतृत्व हरपले; चंद्रकांत बाफना यांना शनिवार दिनांक २१ मार्च रोजी शिरूर येथे श्रद्धांजली वाहण्यासाठी श्रद्धांजली सभा

शिरूर { डेली न्यूज पोस्ट टीम 24}शहराचे माजी उपनगराध्यक्ष, शिरूर शिक्षण प्रसारक मंडळाचे माजी उपाध्यक्ष तसेच प्रयोगशील शेतकरी म्हणून ओळख असलेले चंद्रकांत शोभाचंद बाफना यांच्या निधनाने शिरूरमध्ये हळहळ व्यक्त होत आहे. सोमवारी (दि. ९ मार्च २०२६) त्यांचे निधन झाले. त्यांच्या जाण्याने सामाजिक, शैक्षणिक व सार्वजनिक क्षेत्रातील एक अभ्यासू, सर्वसमावेशक आणि सुसंस्कृत नेतृत्व हरपल्याची भावना नागरिकांतून व्यक्त होत आहे.

बाफना हे अजातशत्रू व्यक्तिमत्त्व म्हणून परिचित होते. विविध क्षेत्रांतील लोकांना जोडून ठेवण्याची त्यांची हातोटी, तसेच समाजकार्यातील सक्रिय सहभाग यामुळे त्यांनी शिरूरकरांच्या मनात आपले वेगळे स्थान निर्माण केले होते. शिक्षण, समाजसेवा आणि शेती या क्षेत्रांत त्यांनी दिलेले योगदान उल्लेखनीय मानले जाते.

त्यांच्या स्मृतींना आदरांजली वाहण्यासाठी शनिवारी (दि. २१ मार्च) सकाळी ११ वाजता जैन पंचायत भवन, जुनी नगरपालिका समोर, शिरूर येथे श्रद्धांजली सभेचे आयोजन करण्यात आले आहे. या सभेला विविध सामाजिक संस्था, संघटना तसेच नागरिक मोठ्या संख्येने उपस्थित राहणार असल्याची माहिती आयोजकांकडून देण्यात आली.समस्त शिरूरकरांच्या वतीने आयोजित या सभेत बाफना यांना  श्रद्धांजली अर्पण केली जाणार आहे.