शिरुरमध्ये भटक्या कुत्र्यांसाठी निवारा व आहार क्षेत्र निश्चित

शिरुर { डेली न्यूज पोस्ट टीम -24}शहरात वाढत असलेल्या भटक्या कुत्र्यांच्या समस्येवर शिस्तबद्ध उपाययोजना करण्याच्या दृष्टीने महाराष्ट्र शासनाच्या नगरविकास विभागाच्या शासन निर्णयानुसार व प्राणीजन्म नियंत्रण (ABC) नियम, २०२३ अन्वये शिरुर नगरपरिषदेने महत्त्वाचा निर्णय घेतला आहे. शहरातील भटक्या कुत्र्यांसाठी स्वतंत्र निवारा तसेच निश्चित आहार क्षेत्र जाहीर करण्यात आले असल्याची माहिती मुख्याधिकारी प्रीतम पाटील  यांनी दिली आहे.

शिरुर नगरपरिषदेने शहरातील भटक्या कुत्र्यांच्या प्राणीजन्म नियंत्रणासाठी नगरपरिषदेच्या सांडपाणी प्रक्रिया प्रकल्प (एसटीपी) शेजारील मोकळ्या व सुरक्षित जागेत भटक्या कुत्र्यांचा निवारा व ABC केंद्र स्थापन केले आहे. त्याचबरोबर, कुत्र्यांना खाद्य देण्यासाठी शहरातील आठ ठिकाणे अधिकृतपणे आहार क्षेत्र म्हणून घोषित करण्यात आली आहेत.

घोषित आहार क्षेत्रांमध्ये काची आळीतील दवाखान्यासमोरील मोकळी जागा, शनिमंदिर विसर्जन घाटाकडे जाणाऱ्या रस्त्यालगतची जागा, पीडब्ल्यूडी बस स्टॉपशेजारील मोकळी जागा, पांजरपोळ परिसरातील प्रितम प्रकाशनगर व जोशीवाडी येथील जागा, अमरधाम मेनगेट शेजारील रस्ता, अग्निशमन केंद्रासमोरील मोकळी जागा तसेच दशक्रियाविधी घाट परिसरातील जागांचा समावेश आहे.

नगरपरिषदेने स्पष्ट केले आहे की, या घोषित ठिकाणीच आणि लहान मुले व ज्येष्ठ नागरिक सक्रिय नसतील अशा वेळेतच भटक्या कुत्र्यांना खाद्य द्यावे. या व्यतिरिक्त इतर कोणत्याही ठिकाणी भटक्या कुत्र्यांना खाद्य टाकल्यास संबंधितांवर प्राणीजन्म नियंत्रण (ABC) नियम, २०२३ अंतर्गत दंडात्मक कारवाई करण्यात येणार आहे.

दरम्यान, भटक्या कुत्र्यांबाबत कोणतीही समस्या किंवा तक्रार असल्यास नागरिकांनी १९६२ किंवा १८००-२३३-२१२३ या टोल फ्री हेल्पलाईन क्रमांकावर संपर्क साधावा, असे आवाहन शिरुर नगरपरिषदेने केले आहे.