कर्मवीर डॉ.भाऊराव पाटील यांच्या जयंतीनिमित्त शिरूरमध्ये प्रतिमेची मिरवणूक

शिरूर { डेली न्यूज पोस्ट टीम- 24}: रयत शिक्षण संस्थेचे संस्थापक कर्मवीर डॉ. भाऊराव पाटील यांच्या जयंतीनिमित्त शिरूर शहरातून त्यांच्या प्रतिमेची उत्साहपूर्ण मिरवणूक काढण्यात आली. मिरवणुकीपूर्वी शहरातील जुन्या नगरपरिषद कार्यालयाच्या इमारतीतील कर्मवीर भाऊराव पाटील यांच्या पुतळ्यास पुष्पहार अर्पण करून मान्यवरांनी अभिवादन केले.

रयत शिक्षण संस्थेचे मॅनेजिंग कौन्सिल सदस्य जाकीरखान शहिदखान पठाण, माजी उपनगराध्यक्ष चंद्रकांत बोरा, छत्रपती शिवाजी महाराज जयंती उत्सव समितीचे अध्यक्ष रवींद्र धनक, मुख्याध्यापक संजय मचाले, माजी मुख्याध्यापक दत्तात्रेय शिंदे,डॉ. अतुलकुमार बेंद्रे,बादशहाभाई मन्यार, डॉ. राहुल घावटे, उदय शिंदे, नितीन मुथा, गणेश घाडगे आदी उपस्थित होते. मिरवणुकीच्या मार्गावर नगरसेवक सागर नरवडे व पूजा पोटावळे यांनीही कर्मवीरांच्या प्रतिमेचे दर्शन घेतले.

यावेळी जाकीरखान पठाण म्हणाले, “ग्रामीण भागात शिक्षणाचा प्रसार करण्यामध्ये कर्मवीर डॉ. भाऊराव पाटील यांचे मोठे योगदान आहे. रयत शिक्षण संस्थेच्या माध्यमातून त्यांनी ज्ञानाची गंगा घरोघरी पोहोचविण्याचे महान कार्य केले.”

कर्मवीर भाऊराव पाटील यांच्या प्रतिमेची मिरवणूक पुणे-नगर रस्ता, पडबाजार, राम आळी, निर्माण प्लाझा चौक, रेव्हन्यू कॉलनी मार्गे रयत शाळेच्या परिसरात पोहोचली. मिरवणुकीत कर्मवीरांच्या शैक्षणिक कार्याचा जयघोष करण्यात आला.