शिरूरमध्ये पोलीस अ‍ॅक्शन मोडवर; गुन्हे तपास पथकात फेरबदल, नाकाबंदी आणि कोम्बिंग ऑपरेशनवर भर

शिरूर { डेली न्यूज पोस्ट टीम 24}: गोळीबार, चोरी, मारामारी यांसारख्या वाढत्या गुन्हेगारी घटनांच्या पार्श्वभूमीवर शिरूर पोलिसांनी आता कठोर पावले उचलण्याची तयारी केली आहे. गुन्हेगारीला आळा घालण्यासाठी गुन्हे तपास पथकात फेरबदल, रात्रीची गस्त अधिक प्रभावी करणे, व्यापक नाकाबंदी आणि कोम्बिंग ऑपरेशन राबविण्यात येणार आहे. गुन्हेगारी प्रवृत्तीची व्यक्ती कितीही मोठी असली, तरी तिच्यावर कठोर कारवाई केली जाईल, असा इशारा पोलीस उपअधीक्षक रवींद्र भोसले यांनी दिला.

शिरूर परिसरात अलीकडच्या काळात गोळीबार, चोरी, मारामारीसह विविध गुन्ह्यांच्या घटनांमध्ये वाढ झाल्याचे चित्र आहे. या पार्श्वभूमीवर पोलीस उपअधीक्षक भोसले यांनी बातमीदारांशी संवाद साधला. पोलीस अधीक्षक संदीपसिंग गिल यांनी वाढत्या गुन्हेगारीवर नियंत्रण मिळविण्यासाठी कठोर कारवाई करण्याच्या सूचना दिल्याचे त्यांनी सांगितले.
शिरूर पोलीस ठाण्यातील यापूर्वीचे डीबी पथक रद्द करण्यात आले असून, सहाय्यक पोलीस निरीक्षक शिवाजी चव्हाण आणि सुधीर टेंगले यांच्यावर जबाबदारी सोपविण्यात आली आहे. नव्या अधिकाऱ्यांसह स्वतंत्र गुन्हे तपास पथकाची रचना करण्यात आली आहे. गुन्हेगारीच्या मुळावर घाव घालून गुन्हेगारांवर कठोर कारवाई करण्यावर भर दिला जाणार आहे.
शहरातील हॉटेल्स आणि विविध आस्थापना रात्री अकरा वाजेपर्यंतच सुरू ठेवण्याच्या सूचना देण्यात आल्या आहेत. त्यानंतरही आस्थापना सुरू आढळल्यास संबंधितांवर कारवाई करण्यात येईल, असा इशाराही पोलिसांनी दिला आहे.
शहरात आणि परिसरात मोठ्या प्रमाणावर नाकाबंदी करण्यात येणार असून, परजिल्ह्यांतून येणाऱ्या गुन्हेगारी प्रवृत्तीच्या व्यक्तींवर लक्ष ठेवण्यासाठी कोम्बिंग ऑपरेशन राबविण्यात येणार आहे. अनधिकृत टपऱ्या हटविणे, रात्रीची गस्त अधिक प्रभावी करणे आणि ग्रामसुरक्षा दल कार्यान्वित करणे, अशा उपाययोजनाही करण्यात येणार असल्याचे भोसले यांनी स्पष्ट केले.
यावेळी पोलीस निरीक्षक विनोद पाटील उपस्थित होते.