शिरूरमध्ये राष्ट्रीय स्वयंसेवक संघाचे संचलन; विजयादशमी उत्सव उत्साहात

शिरूर (डेली न्यूज पोस्ट टीम 24) : राष्ट्रीय स्वयंसेवक संघाच्या स्थापना दिनानिमित्त विजयादशमीला शिरूर शहरात स्वयंसेवकांचे शिस्तबद्ध संचलन झाले. तसेच शिरूर नगरपालिकेच्या मंगल कार्यालयात आयोजित विजयादशमी उत्सव व पारंपरिक शस्त्रपूजन सोहळा उत्साहात पार पडला. या कार्यक्रमाला २५५ हून अधिक स्वयंसेवक, महिला व नागरिक उपस्थित होते.

जिजामाता गार्डनसमोरील मैदानातून संचलनाला सुरुवात झाली. गणवेशातील तरुण व ज्येष्ठ स्वयंसेवक यात सहभागी झाले होते. अग्रभागी दंडधारी स्वयंसेवक, त्यामागे ध्वजधारक, घोषपथक आणि स्वयंसेवकांची शिस्तबद्ध रांग होती. घोषपथकाच्या वादनाने लक्ष वेधून घेतले, तर शहरातील विविध ठिकाणी पुष्पवृष्टी करून संचलनाचे स्वागत करण्यात आले. मारुती आळी, सरदार पेठ, हलवाई चौक, सोनार आळी, आडत बाजार, कापड बाजार, रेव्हन्यू कॉलनी आणि जुन्या पुणे-अहिल्यानगर रस्त्याने मार्गक्रमण करत संचलनाची सांगता झाली.

विजयादशमी उत्सवाला ज्येष्ठ पत्रकार नितीन तुकाराम बारवकर प्रमुख पाहुणे म्हणून उपस्थित होते. राष्ट्रीय स्वयंसेवक संघाचे पुणे विभाग सहकार्यवाह अविनाश भेगडे यांनी प्रमुख वक्ते म्हणून मार्गदर्शन केले. शिरूर तालुका संघचालक दत्तात्रय केशव धोंगडे यांची प्रमुख उपस्थिती होती. संघपरंपरेनुसार शस्त्रपूजनाने कार्यक्रमाची सुरुवात झाली. यावेळी सांघिक पद्य, अमृतवचन, सुभाषित आणि वैयक्तिक पद्य सादर करण्यात आले.

देशातील शांतता, सामाजिक सलोखा आणि राष्ट्रीय एकात्मता टिकवण्यासाठी सकारात्मक विचारांची गरज असून, समाजात जनजागृती व परिवर्तन घडवण्यासाठी ‘शब्द’ हे प्रभावी माध्यम आहे. त्याचा वापर समाजहितासाठी व्हावा, असे नितीन बारवकर यांनी सांगितले.

भारताला २०४७ पर्यंत विकसित राष्ट्र बनवण्यासाठी प्रत्येक नागरिकाने कर्तव्यभावनेतून योगदान द्यावे, असे आवाहन अविनाश भेगडे यांनी केले. भारतीय संस्कृतीचे जतन, पर्यावरण संवर्धन, जलसंधारण, वृक्षारोपण, प्लास्टिकमुक्ती आणि सक्षम कुटुंबव्यवस्थेला दैनंदिन जीवनात महत्त्व देण्याचे आवाहनही त्यांनी केले.

राष्ट्रसेवा, सामाजिक समरसता आणि संघकार्याचा विस्तार हा संदेश देत संघाच्या प्रार्थनेने कार्यक्रमाची सांगता झाली.