सामाजिक कार्यकर्ते व लोक जागृती संघटनेचे अध्यक्ष ॲड. ओमप्रकाश सतीजा यांचे निधन

शिरूर { डेली न्यूज पोस्ट टीम 24}
शहरातील सामाजिक चळवळींचे मार्गदर्शक, लोकजागृती संघटनेचे अध्यक्ष तसेच राजधानी इलेक्ट्रॉनिक्सचे संचालक ॲड. ओमप्रकाश बन्सीलाल सतीजा (वय ७१) यांचे निधन झाले. त्यांच्या जाण्याने शिरूरच्या सामाजिक क्षेत्रातील एक शांत, अभ्यासू आणि निष्ठावान व्यक्तिमत्व काळाच्या पडद्याआड गेले आहे.
मितभाषी स्वभाव, परखड विचार आणि समाजकार्याची अखंड तळमळ ही सतीजा यांची ओळख होती. शिरूर शहरातील विविध सामाजिक चळवळींमध्ये त्यांनी केवळ सहभागच घेतला नाही, तर अनेक उपक्रमांना दिशा देणारे मार्गदर्शक म्हणूनही ते ओळखले जात. लोकजागृती संघटना, छत्रपती शिवाजी महाराज जयंती उत्सव समिती, स्वर्गीय धनराज नहार व्याख्यानमाला, क्रांती दिनानिमित्त आयोजित रक्तदान शिबिर अशा विविध उपक्रमांत त्यांची सक्रिय भूमिका होती. हलवाई गणेश मित्र मंडळ, हलवाई चौक येथेही ते सल्लागार म्हणून कार्यरत होते.
समाजातील विविध प्रश्नांवर अभ्यासपूर्वक मते मांडत त्यांनी अनेकांना विचारांची दिशा दिली. कोणत्याही प्रसिद्धीच्या अपेक्षेविना कार्य करण्याची त्यांची वृत्ती अनेक कार्यकर्त्यांसाठी प्रेरणादायी ठरली. त्यामुळेच त्यांच्या निधनाने शिरूर परिसरातील सामाजिक संघटनांचा एक भक्कम आधारवड हरपल्याची भावना व्यक्त होत आहे.
त्यांच्या पश्चात पत्नी, एक मुलगा, एक विवाहित मुलगी, नातवंडे तसेच तीन बंधू असा परिवार आहे. व्यावसायिक योगी सतीजा यांचे ते वडील होत, तर महेंद्र, किशोर व राजेश सतीजा यांचे ते ज्येष्ठ बंधू होत.
त्यांची अंत्ययात्रा सोमवार, दि. २० एप्रिल २०२६ रोजी दुपारी १ वाजता नक्षत्र प्रीमिअर, नगर-पुणे रोड, प्रीतमप्रकाश नगर येथून निघून अमरधाम, शिरूर येथे अंत्यसंस्कारासाठी जाईल.
ॲड. ओमप्रकाश सतीजा यांच्या जाण्याने शिरूरच्या सामाजिक जीवनातील एक विचारवंत, संयमी आणि निस्वार्थी कार्यकर्ता हरपला असल्याची भावना सर्वत्र व्यक्त होत आहे.