डेक्कन स्कूलमध्ये २७ वा कारगिल विजय दिन देशभक्तीपूर्ण वातावरणात साजरा

शिरूर{ डेली न्यूज पोस्ट टीम 24}: बाबुराव नगर येथील डेक्कन स्कूलमध्ये २७ वा कारगिल विजय दिन देशभक्तीपूर्ण आणि उत्साहपूर्ण वातावरणात साजरा करण्यात आला. या कार्यक्रमासाठी भारतीय सैन्याचे निवृत्त सुभेदार मेजर अशोक वाळुंज प्रमुख पाहुणे म्हणून उपस्थित होते.
कार्यक्रमाच्या प्रारंभी सुभेदार मेजर अशोक वाळुंज यांचे औक्षण करून त्यांचे स्वागत करण्यात आले. शाळेचे मुख्याध्यापक डॉ. समीर ओंकार यांच्या हस्ते त्यांचा शाल, श्रीफळ व पुष्पगुच्छ देऊन सत्कार करण्यात आला.
विद्यार्थ्यांशी संवाद साधताना सुभेदार वाळुंज यांनी कारगिल युद्धाची पार्श्वभूमी, भारतीय जवानांनी दाखविलेला अद्वितीय शौर्यपराक्रम आणि देशासाठी केलेल्या सर्वोच्च बलिदानाची प्रेरणादायी माहिती दिली. तसेच भारतीय सैन्यात होत असलेले आधुनिक बदल, सैन्यदलातील करिअरच्या संधी आणि देशसेवेचे महत्त्व याविषयी विद्यार्थ्यांना मार्गदर्शन केले. त्यांच्या प्रेरणादायी विचारांना विद्यार्थ्यांनी उत्स्फूर्त प्रतिसाद दिला.
यावेळी व्यासपीठावर मुख्याध्यापक डॉ. समीर ओंकार, शिक्षक प्रतिनिधी सौ. जयश्री दांडगे उपस्थित होत्या. कार्यक्रमाचे नियोजन शिक्षक श्री. अमोल वाघमारे आणि श्री. लहू धारजे यांनी केले. कार्यक्रमाच्या शेवटी सौ. अक्षता दिवेकर यांनी उपस्थितांचे आभार मानले. देशभक्तीच्या घोषणांनी आणि कारगिल वीरांच्या स्मरणाने कार्यक्रमाची सांगता झाली.