शिरूर शहर मंजूर विकास आराखड्यातील आरक्षणांना विशेष सर्वसाधारण सभेची मंजुरी

शिरूर{ डेली न्यूज पोस्ट टीम 24}: शिरूर नगरपरिषदेची विशेष सर्वसाधारण सभा मंगळवारी नगराध्यक्ष ऐश्वर्या अभिजित पाचर्णे यांच्या अध्यक्षतेखाली पार पडली. या सभेत शिरूर शहराच्या मंजूर विकास आराखड्यातील विविध आरक्षणांबाबत महत्त्वपूर्ण निर्णय घेण्यात आले. विशेषतः म्युनिसिपल इंडस्ट्रियल इस्टेटसाठी देण्यात आलेल्या शासकीय जमिनीची मालकी नगरपरिषदेकडे कायम ठेवण्यास तसेच मंजूर विकास आराखड्यानुसार त्या जागेचा वापर बदलण्याच्या प्रस्तावास मंजुरी देण्यात आली.

सभेत सादर करण्यात आलेल्या विषयानुसार, शिरूर नगरपरिषद हद्दीतील सुमारे १५ एकर क्षेत्रावरील शासकीय जमिनीचा पूर्वीचा वापर बदलून मंजूर विकास आराखड्यात नमूद असलेल्या आरक्षणांनुसार क्रीडांगण, बाग, ग्रंथालय, सांस्कृतिक सभागृह तसेच व्यापारी संकुल यांसारख्या सार्वजनिक सुविधांचा विकास करण्याचा निर्णय घेण्यात आला. या बदलासाठी महाराष्ट्र शासनाकडे आवश्यक प्रस्ताव पाठविण्यात आला असून संबंधित विभागांकडून सकारात्मक कार्यवाही सुरू असल्याची माहिती सभेत देण्यात आली.

यापूर्वी महसूल विभागाच्या बैठकीत संबंधित जमीन नगरपरिषदेकडे कायम ठेवण्याबाबत चर्चा झाली होती. त्यानुसार नगरपरिषदेने शासनाच्या सूचनांनुसार आवश्यक प्रस्ताव सादर केला असून अंतिम मंजुरीसाठी तो शासन स्तरावर पाठविण्यात आला आहे.

विशेष सर्वसाधारण सभेत या प्रस्तावाला एकमताने मंजुरी देण्यात आली. यावेळी नगराध्यक्ष ऐश्वर्या अभिजित पाचर्णे, उपाध्यक्ष मितेश प्रदीप गादिया, सभापती सुनील जाधव  एजाज बागवान ,  डॉ. सुनीता पोटे, स्वाती साठे, आयेशा सय्यद उपसभापती स्वप्नाली जामदार , भाजपचे नितीन पाचर्णे यांच्या सह नगरसेवक,  मुख्याधिकारी प्रितम पाटील तसेच नगरपरिषदेचे अधिकारी व कर्मचारी उपस्थित होते.