संत सेना महाराज पुण्यतिथीनिमित्त शिरूरमध्ये विविध धार्मिक कार्यक्रम

शिरूर {डेली न्यूज पोस्ट टीम 24}श्री संत शिरोमणी सेना महाराज यांच्या पुण्यतिथीनिमित्त शिरूर शहर नाभिक संघटनेच्या वतीने मंगळवार (दि. ८ सप्टेंबर) रोजी शिरूर येथील संत सेना महाराज मंदिरात विविध धार्मिक कार्यक्रमांचे आयोजन करण्यात आले. यानिमित्त सकाळपासून मंदिर परिसरात भक्तिमय वातावरण निर्माण झाले होते.

यावेळी बोलताना भारतीय जनता पक्षाचे तालुकाध्यक्ष राहुल बाबुराव पाचर्णे म्हणाले, “संत सेना महाराज मंदिर तसेच साई मंदिराच्या सभामंडपाचा विषय मार्गी लावण्यासाठी आणि त्यासाठी आवश्यक निधी उपलब्ध करून देण्यासाठी आपण प्रयत्न करणार आहोत.” मंदिराच्या विकासासाठी आवश्यक सहकार्य करण्याची ग्वाही त्यांनी यावेळी दिली.

पुण्यतिथीनिमित्त सकाळी ८ ते १० वाजता संत सेना महाराज मूर्ती अभिषेक, सकाळी १० ते १२ वाजता सरदवाडी भजनी मंडळाचे भजन, दुपारी १२ वाजता संत सेना महाराज यांची महाआरती तसेच त्यानंतर महाप्रसादाचे आयोजन करण्यात आले होते. भाविकांनी मोठ्या संख्येने उपस्थित राहून दर्शन व धार्मिक कार्यक्रमांचा लाभ घेतला.

कार्यक्रमास नगराध्यक्षा ऐश्वर्या अभिजीत पाचर्णे, शिरूर नगरपरिषद आरोग्य समितीचे सभापती एजाज बागवान, नगरसेविका राजापूरे, नगरसेवक सागर नरवडे, अमित कर्डिले, निलेश पवार, पंचायत समितीचे माजी सदस्य आबासाहेब सरोदे, माजी सरपंच विठ्ठल घावटे, माजी नगराध्यक्ष राजेंद्र क्षीरसागर आदी उपस्थित होते.

शिरूर नाभिक संघटनेचे अध्यक्ष सनी थोरात, माजी अध्यक्ष भाऊसाहेब क्षीरसागर, गोरक्षनाथ गायकवाड, रणजित गायकवाड, बाळासाहेब शिंदे,माजी नगरसेविका अंजली मयूर थोरात भाऊसाहेब पवार यांच्यासह नाभिक समाजबांधव व भाविक मोठ्या संख्येने उपस्थित होते.

संत सेना महाराजांच्या पुण्यतिथीनिमित्त आयोजित या कार्यक्रमामुळे मंदिर परिसर भक्तिरसात न्हाऊन निघाला होता.