शिरूरमध्ये आषाढी एकादशीनिमित्त भक्तिमय कार्यक्रमांची रेलचेल; ‘भावगंध’ व ‘विठ्ठल नामाचा गजर ‘भक्तिसंगीत मैफल आणि खिचडी वाटपाचे आयोजन

शिरूर { डेली न्यूज पोस्ट टीम 24}: आषाढी एकादशीनिमित्त शिरूर शहरात विविध धार्मिक व सामाजिक संस्थांच्या वतीने भक्तिमय कार्यक्रमांचे आयोजन करण्यात आले असून, भक्ती, संस्कृती आणि समाजसेवेचा संगम अनुभवायला मिळणार आहे. ओंकार संगीत विद्यालयाच्या वतीने भक्तिसंगीताची मैफल, तर ओन्ली वुमन्स जिम आणि वुमन्स सोशल फाउंडेशनच्या वतीने खिचडी वाटपाचा उपक्रम आयोजित करण्यात आला आहे.

ओंकार संगीत विद्यालयाच्या वतीने शनिवार, २५ जुलै रोजी सायंकाळी ६ वाजता कुंभार आळी येथील श्री विठ्ठल मंदिरात ‘भावगंध’ या भक्तिसंगीताच्या स्वरमैफलीचे आयोजन करण्यात आले आहे. या मैफलीत अभंग, गवळणी, भक्तिगीते, संतवाणी यांचे सादरीकरण होणार असून, विठ्ठलभक्तांना भक्तिरसाने ओतप्रोत भरलेला संगीताचा अविस्मरणीय अनुभव मिळणार आहे. वारकरी संप्रदायाची परंपरा, संतांच्या विचारांचा संदेश आणि भक्तीभाव संगीताच्या माध्यमातून रसिकांपर्यंत पोहोचविण्याचा या कार्यक्रमाचा उद्देश असल्याचे प्रसिद्ध गायक वैभव उर्फ गणेश मराठे यांनी सांगितले.

दरम्यान, ओन्ली वुमन्स जिम आणि वुमन्स सोशल फाउंडेशन यांच्या संयुक्त विद्यमाने आषाढी एकादशीनिमित्त अन्नदान (खिचडी वाटप) कार्यक्रमाचे आयोजन करण्यात आले आहे. शनिवार, २५ जुलै रोजी सकाळी ९.३० वाजता शिरूर येथील इंदिरा गांधी पुतळा परिसरात हा उपक्रम पार पडणार आहे. “पंढरीच्या वाटेवर भक्तांची सेवा हीच खरी विठ्ठलाची पूजा” या भावनेतून भाविकांना खिचडीचे वाटप करण्यात येणार आहे.

आयोजकांनी नागरिकांनी मोठ्या संख्येने उपस्थित राहून भक्तिसंगीताचा आनंद घ्यावा तसेच अन्नदानाच्या पुण्यकार्यात सहभागी व्हावे, असे आवाहन केले आहे.

आषाढी एकादशीच्या निमित्ताने शिरूर येथील विठ्ठलनगर परिसरातील ध्यान मंदिर येथे शनिवार, दि. २५ जुलै रोजी ‘विठ्ठल नामाचा गजर’ या भक्तिमय कार्यक्रमाचे आयोजन करण्यात आले आहे. श्री संत शिरोमणी सावता महाराज समाजसेवा प्रतिष्ठान व ध्यान मंदिर व्यवस्थापन समिती यांच्या संयुक्त विद्यमाने हा सोहळा पार पडणार असून दिवसभर विविध धार्मिक व सांस्कृतिक कार्यक्रमांचे आयोजन करण्यात आले आहे.

सकाळी ६ वाजता श्री विठ्ठल-रुक्मिणी मूर्तींचा महाअभिषेक नगरसेवक संतोष प्रभाकर थेऊरकर व सौ. अक्षता संतोष थेऊरकर यांच्या हस्ते होणार आहे. त्यानंतर सकाळी ८ वाजता महाआरती नगरसेविका सुनिता आनंद भुजबळ व श्री. आनंद एकनाथ भुजबळ यांच्या हस्ते संपन्न होईल.

दुपारी २ ते ५ या वेळेत ‘विठ्ठल नामाचा गजर’ तसेच हरीभजन संगीत कार्यक्रम आयोजित करण्यात आला असून, स्वरविहार संगीत ग्रुप, शिरूर यांच्यासह ध्यान मंदिर हरिपाठ भजनी मंडळ सहभागी होणार आहे.

सायंकाळी ६ ते ७ या वेळेत हरिपाठ, सायंकाळी ७ वाजता महाआरती आणि त्यानंतर सायंकाळी ७.१५ वाजता प्रसिद्ध कीर्तनकार ह.भ.प. जनाबाई गायकवाड यांचे हरिकीर्तन होणार आहे. या कार्यक्रमाला भाविकांनी मोठ्या संख्येने उपस्थित राहून विठ्ठल नामस्मरणाचा लाभ घ्यावा, असे आवाहन आयोजकांनी केले आहे.