डेक्कन स्कूलमध्ये अग्निहोत्र समारोह उत्साहात संपन्न

शिरूर { डेली न्यूज पोस्ट टीम 24}बाबुरावनगर येथील डेक्कन एज्युकेशन सोसायटी इंग्लिश व सेमी इंग्लिश मीडियम स्कूलमध्ये श्रावण मासानिमित्त अग्निहोत्र समारोहाचे आयोजन करण्यात आले. या माध्यमातून विद्यार्थ्यांमध्ये सूर्योपासना, भारतीय संस्कृती आणि परंपरांचे संस्कार रुजविण्यात आले.

शाळेतील शिक्षक सखाराम पुरी यांनी प्रास्ताविकातून अग्निहोत्राचे महत्त्व विशद केले. विविध माध्यमांतून मिळणारी ऊर्जा ही सूर्याचे स्वरूप असून, त्याबद्दल कृतज्ञता व्यक्त करण्यासाठी तसेच अग्निसंस्कारातून तयार होणाऱ्या अन्नाबद्दल कृतज्ञता व्यक्त करण्यासाठी नियमित अग्निहोत्र करणे आवश्यक असल्याचे त्यांनी सांगितले.

मुख्याध्यापक डॉ. समीर ओंकार यांनी सांगितले की, डेक्कन स्कूलमध्ये रोबोटिक्स, कोडिंग-डिकोडिंग, जर्मन भाषा यांसारख्या आधुनिक शिक्षणासोबतच भारतीय संस्कृती व परंपरांना जपणारे अग्निहोत्र, विद्यारंभ संस्कार आदी उपक्रमही सातत्याने राबविले जातात. राष्ट्रीय शैक्षणिक धोरणाची प्रभावी अंमलबजावणी करण्यात डेक्कन एज्युकेशन सोसायटी अग्रेसर असल्याचेही त्यांनी नमूद केले.

यावेळी स्थानिक सल्लागार समितीचे सदस्य व्ही. डी. कुलकर्णी यांच्या हस्ते गणेशपूजन व नवग्रहपूजन करण्यात आले. त्यानंतर इयत्ता चौथीच्या विद्यार्थ्यांनी होमामध्ये सूर्य, अग्नी व प्रजापती यांच्यासाठी आहुती अर्पण केल्या. शिरूर शिक्षण प्रसारक मंडळाचे संचालक शिरीषजी बरमेचा यांच्या हस्ते आरती करण्यात आली.

कार्यक्रमास डेक्कन स्कूल पालक संघाचे सचिव प्रदीप कुलकर्णी, पर्यवेक्षिका जयश्री दांडगे, पूर्व प्राथमिक विभागाच्या समन्वयक डायना बोर्डे यांच्यासह पालक उपस्थित होते. यावेळी व्ही. डी. कुलकर्णी यांच्या हस्ते शिरीषजी बरमेचा यांचा सत्कार करण्यात आला.

कार्यक्रमाचे पौरोहित्य सखाराम पुरी यांनी केले. शीतल ढवळे यांनी सूत्रसंचालन केले. कार्यक्रमाच्या यशस्वी आयोजनासाठी शिक्षक अमोल वाघमारे, प्रिया नरवडे, अक्षता दिवेकर व मोनाली जाधव यांनी विशेष परिश्रम घेतले.