एटीएम कार्डची अदलाबदल; ज्येष्ठ नागरिकाला ३८ हजारांचा गंडा 

शिरूर { डेली न्यूज पोस्ट टीम 24}एटीएममधून पैसे काढण्यासाठी गेलेल्या ६६ वर्षीय ज्येष्ठ नागरिकाचे एटीएम कार्ड चलाखीने बदलून त्यांच्या खात्यातून तब्बल ३८ हजार रुपये काढून घेतल्याची घटना शिरूर शहरात घडली. याप्रकरणी शिरूर पोलिस ठाण्यात अनोळखी व्यक्तीविरुद्ध फसवणुकीचा गुन्हा दाखल करण्यात आला आहे.

पोलिसांनी दिलेल्या माहितीनुसार, तिरसींग लक्ष्मण पाचर्णे (वय ६६, रा. करडे, ता. शिरूर) हे ८ सप्टेंबर रोजी सायंकाळी सव्वापाचच्या सुमारास बी. जे. कॉर्नरजवळील बँक ऑफ महाराष्ट्रच्या एटीएममध्ये पैसे काढण्यासाठी गेले होते. त्यावेळी एटीएममध्ये असलेल्या ३० ते ३२ वर्षीय अनोळखी व्यक्तीने, “पैसे कट झाले आहेत, स्लिप घेतली नाही; थांबा, मी स्लिप काढून देतो,” असे सांगून त्यांच्याकडून एटीएम कार्ड घेतले.

सदर इसमाने हातचलाखीने पाचर्णे यांचे कार्ड बदलून दुसरे कार्ड त्यांच्या हातात दिले. त्यानंतर त्यांच्या एटीएम कार्डचा वापर करून खात्यातून ३८ हजार रुपये काढून घेतले.

याबाबत पाचर्णे यांच्या तक्रारीवरून ९ सप्टेंबर रोजी शिरूर पोलिस ठाण्यात गु.र.नं. ८०२/२०२६, भारतीय न्याय संहिता कलम ३१८(४) अन्वये गुन्हा दाखल करण्यात आला आहे. आरोपीचा शोध घेण्यासाठी पोलिसांकडून सीसीटीव्ही फुटेज तसेच तांत्रिक माहितीच्या आधारे तपास सुरू आहे. याप्रकरणी अधिक तपास पोलीस निरीक्षक विनोद पाटील यांच्या मार्गदर्शनाखाली पोलीस उपनिरीक्षक चव्हाण करत आहेत.