शिक्षकांच्या कर्तृत्वाचा सन्मान; श्रीमंत हलवाई चौक गणेश मंडळाचा प्रेरणादायी उपक्रम

शिरूर { डेली न्यूज पोस्ट टीम 24}शिक्षक दिनाचे औचित्य साधून श्रीमंत हलवाई चौक गणेश मित्र मंडळाच्या वतीने शुक्रवारी (दि. ११) दुपारी सव्वाबारा वाजता डेक्कन इंग्लिश स्कूल, बाबुरावनगर, शिरूर येथे चार कर्तृत्ववान शिक्षकांचा ‘प्रेरणादायी शिक्षक’ पुरस्काराने विशेष सन्मान करण्यात येणार आहे.
यंदा राष्ट्रपती पारितोषिकप्राप्त आदर्श शिक्षक हरिभाऊ नाथू पानसरे (भाऊ), संगणक शिक्षण क्षेत्रातील संजय पंढरीनाथ वेदपाठक, जिल्हा परिषद शिक्षिका व साधना पतसंस्था तसेच साधना इंटरनॅशनल स्कूलच्या संस्थापक साधना संजय शितोळे आणि डेक्कन स्कूलच्या पर्यवेक्षिका जयश्री ज्ञानेश्वर दांडगे यांचा सन्मान होणार आहे.
हरिभाऊ पानसरे यांनी १९४४ ते १९८४ या चार दशकांच्या शिक्षक सेवेत ग्रामीण विद्यार्थ्यांना शिक्षण, शिष्यवृत्ती व संस्कारांची दिशा दिली. मुलींच्या शिक्षणासाठी जनजागृती, शाळा उभारणी आणि समाजकार्याला त्यांनी योगदान दिले. शिस्त, स्वावलंबन व प्रामाणिकपणाच्या मूल्यांवर अनेक पिढ्या घडविणाऱ्या पानसरे यांचा शतायुषी जीवनप्रवास आजही प्रेरणादायी आहे.
संजय वेदपाठक यांनी मागील ३५ वर्षांपासून संगणक शिक्षण क्षेत्रात उल्लेखनीय कार्य केले आहे. राळेगणसिद्धी येथील CDAC Surya Project मध्ये संगणक विभागप्रमुख, अनंतराव थोपटे महाविद्यालयात कॉम्प्युटर कोऑर्डिनेटर, माणिकचंद धारिवाल इन्स्टिट्यूटमध्ये संगणक शिक्षक आणि वेदपाठक कॉम्प्युटर इन्स्टिट्यूटचे केंद्रप्रमुख म्हणून त्यांनी काम केले. त्यांच्या मार्गदर्शनाखाली हजारो विद्यार्थ्यांनी MS-CIT परीक्षा उत्तीर्ण केली असून अनेकांना रोजगाराच्या संधी मिळाल्या आहेत.
साधना शितोळे या २५ वर्षांहून अधिक काळ जिल्हा परिषद शिक्षिका म्हणून कार्यरत असून विद्यार्थीप्रिय व अभ्यासू शिक्षिका म्हणून त्यांची ओळख आहे. शिक्षणासोबतच महिलांचे संघटन करून त्यांनी साधना पतसंस्थेची स्थापना केली. ज्ञानदानाचा विस्तार करण्यासाठी साधना इंटरनॅशनल स्कूलची स्थापना केली असून सामाजिक कार्यकर्त्या, संघटक आणि सूत्रसंचालिका म्हणूनही त्या कार्यरत आहेत.
जयश्री दांडगे या २० वर्षांहून अधिक काळ शिक्षिका म्हणून कार्यरत असून सध्या डेक्कन स्कूलमध्ये पर्यवेक्षिका आहेत. विद्यार्थ्यांमध्ये शिस्त निर्माण करण्याबरोबरच किशोरवयीन विद्यार्थ्यांसाठी विविध जागृतीपर उपक्रम, तसेच मोबाईलच्या अतिवापराबाबत पालकांचे प्रबोधन करण्यात त्यांचा पुढाकार असतो.
दरम्यान, हलवाई चौक गणेश मंडळाने यापूर्वीही शैक्षणिक क्षेत्रातील योगदानाबद्दल अनेक मान्यवरांचा ‘प्रेरणादायी शिक्षक’ पुरस्काराने गौरव केला आहे. यामध्ये राष्ट्रपती पदकप्राप्त शिक्षक दत्तात्रय वारे, प्राचार्य व शास्त्रज्ञ डॉ. के. सी. मोहिते, गंगा एज्युकेशन संस्थेचे अध्यक्ष प्रा. डॉ. राजेराम घावटे, संशोधक प्रा. डॉ. बाळकृष्ण लळीत, सीताबाई थिटे फार्मसी महाविद्यालयाचे प्राचार्य डॉ. द्वारकादास बाहेती, प्राचार्य डॉ. अमोल शहा, प्रा. चंद्रकांत धापटे, खेळाडू व शिक्षिका अनिता भोगावडे, मुख्याध्यापिका अश्विनी घारू, सीमा आगरवाल, प्राचार्य डॉ. समीर ओंकार, डॉ. प्रा. क्रांती पैठणकर, प्रा. अलका बेलोटे (बोरुडे), प्रा. विलास आंबेकर, दादासाहेब गवारी, नान्सी पायस, प्रसाद शिंदे, नीता पडवळ, क्रीडा शिक्षक नारायण काळे, विद्या विवेक सोळसे (वाघमारे), मुख्याध्यापिका स्वाती थोरात, डॉ. प्रा. ज्योती धोत्रे, क्रीडा शिक्षक संदीप घावटे, प्रताप भोईटे, मुख्याध्यापक विनायक म्हसवडे, मुख्याध्यापिका ज्योती मुळे, सुनीता बिहाणी, मुख्याध्यापिका पसक्कीन कासी, मनीषा चौधरी आणि ओंकार संगीत विद्यालयाचे प्रमुख गणेश मराठे यांचा समावेश आहे.
या कार्यक्रमास शिरूर शिक्षण प्रसारक मंडळाचे माजी अध्यक्ष सुकुमार भाऊ बोरा, नगराध्यक्षा ऐश्वर्या अभिजित पाचर्णे, उपनगराध्यक्ष मितेश गादिया, पोलीस निरीक्षक विनोद पाटील, नगरपरिषद सभापती, नगरसेवक-नगरसेविका, महात्मा फुले कृषी विद्यापीठाचे सेवानिवृत्त प्रा. डॉ. दीपक गायकवाड, माजी प्राचार्य डॉ. सदाशिव सोहोनी, प्राचार्य डॉ. आर. एस. जैन, प्राचार्य डॉ. समीर ओंकार, प्रा. चंद्रकांत धापटे, माजी मुख्याध्यापक व्ही. डी. कुलकर्णी, मंडळाचे अध्यक्ष मयूर काळे यांच्यासह पदाधिकारी उपस्थित राहणार आहेत.
शिक्षकांच्या कर्तृत्वाचा गौरव करणाऱ्या या उपक्रमास मंडळाचे हितचिंतक, सभासद, देणगीदार आणि शिरूरकरांनी मोठ्या संख्येने उपस्थित राहावे, असे आवाहन श्रीमंत हलवाई चौक गणेश मंडळ ट्रस्टच्या वतीने करण्यात आले आहे.