बाबुराव दौंडकर स्मारक समितीकडून विविध पुरस्कार जाहीर; ९ ऑगस्ट रोजी होणार गौरव सोहळा

शिरूर { डेली न्यूज पोस्ट टीम 24}शिरूर तालुक्यात कृषी, पर्यावरण, जलव्यवस्थापन, गोसेवा आणि सेवाकार्य क्षेत्रात उल्लेखनीय योगदान देणाऱ्या व्यक्तींचा गौरव करण्यासाठी बाबुराव दौंडकर स्मारक समितीतर्फे यंदाचे विविध पुरस्कार जाहीर करण्यात आले आहेत. गेल्या २९ वर्षांपासून समिती तालुक्यात काम करीत आहे . समाजात निःस्वार्थपणे कार्य करणाऱ्या व्यक्ती व संस्थांच्या कार्याचा सन्मान बाबुराव दौंडकर स्मारक समिती करत असून त्यांच्या कार्यातून समाजाला प्रेरणा मिळावी, या उद्देशाने हा उपक्रम सातत्याने राबविला जात आहे.

यंदा स्वर्गीय कांचनभाई शहा जलव्यवस्थापन पुरस्कार राजेंद्र पोपटराव गदादे (तांदळी, ता. शिरूर), स्वर्गीय बिंदूमाधव जोशी पर्यावरण पुरस्कार उमेश रणदिवे (रांजणगाव सांडस, ता. शिरूर), स्वर्गीय मधुकर अण्णा टेमगिरे कृषी गौरव पुरस्कार (पुरुष) विजीत शिवाजीराव मांढरे (शिक्रापूर, ता. शिरूर), स्वर्गीय संतोबापू गांधी गोसेवा पुरस्कार हरिदास कोंडीबा खिल्लारी (टाकळी हाजी, ता. शिरूर), स्वर्गीय गणपत मुकिंदा खेडकर सेवाकार्य पुरस्कार शहाजी बाळासाहेब दळवी (कान्हूर मेसाई, ता. शिरूर) तसेच स्वर्गीय बबूताई बाबुराव दौंडकर कृषी गौरव पुरस्कार (महिला) सौ. सुनीता अर्जुन फराटे (मांडवगण फराटा, ता. शिरूर) यांना जाहीर करण्यात आले आहेत.

पुरस्कारार्थींना रुपये ५,००१ रोख, मानपत्र व स्मृतिचिन्ह देऊन गौरविण्यात येणार आहे. पुरस्कार वितरण सोहळा रविवार, दि. ९ ऑगस्ट २०२६ रोजी सकाळी १०.३० वाजता समितीच्या सभागृहात, रांजणगाव (ता. शिरूर, जि. पुणे) येथे होणार आहे. कार्यक्रमाच्या अध्यक्षस्थानी सकाळ मीडिया समूहाचे अध्यक्ष प्रतापराव पवार राहणार असून प्रमुख उपस्थिती डॉ. प्रवीण दवडघाव यांची असणार आहे.

ही माहिती समितीचे अध्यक्ष ॲड. धर्मेंद्र खांडे, उपाध्यक्ष धनंजय गायकवाड, कोषाध्यक्ष सागर फराटे, संचालक दत्तात्रय दरेकर , बाळासाहेब पुंडे, सौ. हेमलता पुंडे तसेच समिती अधिकारी सुरज दामोधर यांनी दिली. शिरूर तालुक्याच्या विकासासाठी विविध क्षेत्रांत उल्लेखनीय कार्य करणाऱ्या पुरस्कारार्थींचा गौरव सोहळा करिता नागरिकांनी मोठ्या संख्येने उपस्थित राहावे, असे आवाहन समितीचे अध्यक्ष ॲड. धर्मेंद्र खांडरे यांनी केले आहे.