पीएमपीएमएल बस शिरूर येथे मुक्कामी ठेवण्याची मागणी

शिरूर { डेली न्यूज पोस्ट टीम- 24}: शिरूर–वाघोली दरम्यान सकाळी साडे सहा ते सातच्या दरम्यान व सायंकाळी नऊ ते साडेनऊच्या दरम्यान थेट पीएमपीएमएल बससेवा सुरू करून संबंधित बस शिरूर येथे मुक्कामी ठेवावी, अशी मागणी माजी महाराष्ट्र लोकसेवा आयोगाचे अध्यक्ष किशोरराजे निंबाळकर यांनी पीएमपीएमएलचे महाव्यवस्थापक यांच्याकडे निवेदनाद्वारे केली आहे.

निंबाळकर यांनी दिलेल्या निवेदनात म्हटले आहे की, शिरूर हे पुणे–अहिल्यानगर महामार्गावरील महत्त्वाचे शहर असून शिक्षण, व्यापार आणि उद्योगाचे प्रमुख केंद्र आहे. रांजणगाव एमआयडीसीसह कर्डे व सुपा औद्योगिक परिसरात मोठ्या प्रमाणावर रोजगार उपलब्ध होत आहे. शिरूर परिसरातील विद्यार्थी, कर्मचारी, कामगार आणि व्यावसायिक दररोज पुणे व वाघोलीकडे प्रवास करतात. मात्र, सकाळी साडे सहा ते सातच्या दरम्यान व सायंकाळी नऊ ते साडेनऊ च्या दरम्यान थेट बससेवेचा अभाव असल्याने प्रवाशांना गैरसोयीचा सामना करावा लागत आहे.

त्यामुळे सकाळी ६.३० ते ७.०० या वेळेत शिरूर–वाघोली थेट बससेवा, तसेच रात्री ९.०० ते ९.३० या वेळेत वाघोली–शिरूर थेट बससेवा सुरू करण्यात यावी. संबंधित बस शिरूर येथे मुक्कामी ठेवण्याचीही त्यांनी मागणी केली आहे.

ही सेवा सुरू झाल्यास विद्यार्थी, नोकरदार, कामगार, व्यावसायिक आणि सर्वसामान्य प्रवाशांची मोठी सोय होईल तसेच सार्वजनिक वाहतुकीला चालना मिळेल, असेही निवेदनात नमूद करण्यात आले आहे.

पीएमपीएमएल प्रशासनाने या मागणीचा सकारात्मक विचार करून लवकरात लवकर आवश्यक कार्यवाही करावी.