भरधाव पिकअपची दुचाकीला धडक; २२ वर्षीय तरुणाचा मृत्यू

शिरूर { डेली न्यूज पोस्ट टीम 24}: रांजणगाव ते सोनेसांगवी पठार मार्गावर भरधाव वेगाने आलेल्या पिकअपने दुचाकीला समोरून जोरदार धडक दिल्याने २२ वर्षीय तरुणाचा मृत्यू झाला. हा अपघात शनिवारी (२९ ऑगस्ट) रात्री आठच्या सुमारास सोनेसांगवी पठार गावाच्या हद्दीत घडला.दीपक राजेश थोरात (वय २२, रा. टाकळी हाजी, शिंदे वस्ती, ता. शिरूर) हा हिरो स्प्लेंडर दुचाकी क्रमांक एमएच १२ यू.वाय ७११२ वरून रांजणगावकडून सोनेसांगवीच्या दिशेने जात होता. त्यावेळी समोरून आलेल्या एमएच १२ झेडयू ४४१५ क्रमांकाच्या पिकअपने त्याच्या दुचाकीला जोरदार धडक दिली.

पिकअप चालक संजय सदाशिव वाळके (वय ३९, रा. लोणी काळभोर, माळी मळा, ता. हवेली) याने वाहन भरधाव वेगाने, वाहतूक व रस्ते नियमांकडे दुर्लक्ष करून तसेच मद्यप्राशन केलेल्या अवस्थेत चालविल्याचा आरोप फिर्यादीत करण्यात आला आहे.

या अपघातात दीपक थोरात यांच्या तोंडाला, डोक्याला तसेच डाव्या हाताला व पायाला गंभीर दुखापत झाली. मोठ्या प्रमाणात रक्तस्राव झाल्याने त्यांचा मृत्यू झाला. अपघातात दुचाकीचेही नुकसान झाले आहे.

याप्रकरणी वैभव शिवाजी शिंदे (वय २९, रा. टाकळी हाजी) यांनी दिलेल्या फिर्यादीवरून रांजणगाव एमआयडीसी पोलीस ठाण्यात गुन्हा क्रमांक ४१०/२०२६ अन्वये भारतीय न्याय संहिता कलम १०५, २८१, १२५(अ)(ब) तसेच मोटार वाहन कायदा कलम १८४ नुसार गुन्हा दाखल करण्यात आला आहे. पोलीस हवालदार मुंडे (१७९५) असून, पुढील तपास पोलीस उपनिरीक्षक चव्हाण करीत आहेत.