वाचनाच्या संस्कारातून घडले यश — ओंकार कडेकर यांचे एमपीएससीत उल्लेखनीय यश

oplus_131090

शिरूर{ डेली न्यूज पोस्ट टीम -24}“वाचनाचा संस्कार हा माझ्या यशाचा मुख्य आधार आहे. स्पर्धा परीक्षेतील यशामागे वाचनाची सवय आणि चिकाटीच कारणीभूत ठरली,” असे मत महाराष्ट्र लोकसेवा आयोगाच्या (MPSC) परीक्षेत यश संपादन केलेले अधिकारी ओंकार सुधीर कडेकर यांनी व्यक्त केले.

शिरूर शहरातील मुंबई बाजार परिसरातील ओंकार कडेकर यांनी महाराष्ट्र लोकसेवा आयोगामार्फत (MPSC) सन २०२२ मध्ये घेण्यात आलेल्या सरळसेवा भरती परीक्षेत उल्लेखनीय यश मिळवले आहे. त्यांनी महाराष्ट्र शासनाच्या असिस्टंट जिओलॉजिस्ट (रँक 6) आणि ज्युनिअर जिओलॉजिस्ट (वर्ग-२) या दोन्ही पदांसाठी पात्रता प्राप्त केली आहे.

ओंकार हे गृहिणी सौ. सुनिता आणि व्यावसायिक सुधीर रघुनाथ कडेकर यांचे सुपुत्र असून, महाराष्ट्र नवनिर्माण सेनेचे माजी शहराध्यक्ष संदीप कडेकर यांचे पुतणे आहेत. त्यांचे शिक्षण पुणे विद्यापीठातून भूगर्भशास्त्र (M.Sc. Geology) या शाखेत झाले. शिक्षणानंतर त्यांनी केंद्रीय भूमिजल मंडळ, पुणे येथे संशोधक म्हणून कार्य केले. नोकरी सांभाळत असतानाही त्यांनी शासकीय स्पर्धा परीक्षेची तयारी सातत्याने आणि नियोजनपूर्वक केली.चिकाटी, आत्मविश्वास आणि नियोजनाच्या बळावर ओंकार यांनी हे यश संपादन केले. त्यांच्या या उल्लेखनीय कामगिरीबद्दल हनुमान गणेश मित्र मंडळ आणि महाराणा प्रताप गणेश मित्र मंडळ, मुंबई बाजार यांच्या वतीने तिळवण तेली समाज शिरूर येथील हनुमान मंदिरात नागरी सत्कार आयोजित करण्यात आला.

कार्यक्रमास मातोश्री सत्यभामा रघुनाथ कडेकर, सुनिता व सुधीर कडेकर, माजी उपनगराध्यक्ष संतोष कडेकर, एस.टी. विभागातील सेवानिवृत्त अधिकारी संजय कडेकर, जनता दलाचे जिल्हाध्यक्ष संजय बारवकर, नगरपरिषद शिक्षण मंडळाचे माजी सभापती प्रदीप बारवकर, प्रा. दत्ता शिंदे, वकील संघटनेचे माजी अध्यक्ष अ‍ॅड. अमित खेडकर, सरिता खेडकर, प्रा. जयश्री कडेकर, प्रा. सायली कडेकर, नगरपालिका अधिकारी भूषण कडेकर, पार्थ कडेकर, सुवर्णा आरे, जान्हवी आरे, सुभाष चोरडिया, प्रा. विजय शेजवळ, आळंदी नगरपरिषदेचे अधिकारी संतोष गाडेकर, प्रथमेश घावटे, कोमल बोरा आदी मान्यवर उपस्थित होते.

सत्काराला उत्तर देताना ओंकार कडेकर म्हणाले, “आई-वडिलांचे कष्ट आणि वडिलांनी दिलेला वाचनाचा संस्कार माझ्या यशाचा पाया ठरला. लहानपणापासून विविध महापुरुषांची चरित्रे आणि विज्ञानविषयक पुस्तके वाचत राहिलो. विज्ञानाची आवड लक्षात घेऊन सायन्स शाखा निवडली आणि पुढे भूगर्भशास्त्र विषयात एम.एस्सी. पूर्ण केली. आता शासकीय अधिकारी म्हणून प्रामाणिकपणे समाजसेवा करणे हेच माझे ध्येय आहे.”

कार्यक्रमाचे सूत्रसंचालन प्रितेश फुलडाळे यांनी केले, तर आभार प्रदर्शन संदीप कडेकर यांनी मानले.