मेंदूतील गाठीवर शस्त्रक्रिया सुरू; संतोष भाऊसाहेब शेवाळे यांच्या उपचारांसाठी आर्थिक मदतीचे आवाहन

शिरूर { डेली न्यूज पोस्ट टीम -24} संतोष भाऊसाहेब शेवाळे (वय ३६) यांच्यावर मेंदूमध्ये पाच सेंटीमीटरची गाठ आढळल्यानंतर तातडीची शस्त्रक्रिया करण्यात येत असून, त्यांच्या उपचारासाठी नागरिकांनी आर्थिक मदतीचा हात पुढे करावा, असे आवाहन कुटुंबीयांनी केले आहे.

एमआरआय तपासणीत मेंदूमध्ये पाच सेंटीमीटरची गाठ असल्याचे निदान झाल्यानंतर डॉक्टरांनी तातडीने शस्त्रक्रियेचा सल्ला दिला. सुरुवातीला त्यांना पुण्यातील रूबी हॉल रुग्णालयात दाखल करण्यात आले होते. मात्र, उपचारासाठी १० ते १२ लाख रुपयांचा खर्च अपेक्षित असल्याने आर्थिक अडचणीमुळे कुटुंबाला तेथे उपचार सुरू ठेवणे शक्य झाले नाही.

यानंतर संतोष शेवाळे यांना अहिल्यानगर येथील अपेक्षा मल्टीस्पेशालिटी हॉस्पिटलमध्ये दाखल करण्यात आले. प्राथमिक शस्त्रक्रियेत गाठीतील द्रव काढण्यात आला असून, सध्या गाठ काढण्यासाठी शस्त्रक्रिया सुरू आहे. डॉक्टरांच्या माहितीनुसार, ही गाठ कर्करोगाची नसल्याने उपचार यशस्वी होण्याची आणि संतोष पूर्णपणे बरे होण्याची आशा व्यक्त करण्यात आली आहे.

संतोष शेवाळे यांच्याकडे दीड एकर शेती आणि छोटा गाय-गोठा हेच उत्पन्नाचे साधन आहे. लहानपणापासून काही प्रमाणात दिव्यांग असल्यामुळे त्यांना नियमित रोजगारही मिळालेला नाही. त्यातच अवघ्या तीन महिन्यांपूर्वी त्यांच्या आईवर हृदयाच्या झडपेची शस्त्रक्रिया झाल्याने त्यासाठी घेतलेल्या कर्जाचा बोजा कुटुंबावर आहे. त्यामुळे वाढता वैद्यकीय खर्च पेलणे अत्यंत कठीण झाले आहे.

सध्या नातेवाईक, मित्रपरिवार आणि गावकऱ्यांच्या मदतीने उपचार सुरू असले तरी पुढील उपचारांसाठी मोठ्या आर्थिक सहाय्याची गरज असल्याचे कुटुंबीयांनी सांगितले आहे. इच्छुक दात्यांनी आपल्या क्षमतेनुसार आर्थिक मदत करून संतोष शेवाळे यांच्या उपचारांना हातभार लावावा, तसेच हे आवाहन अधिकाधिक नागरिकांपर्यंत पोहोचवावे, असेही आवाहन करण्यात आले आहे.

आर्थिक मदतीसाठी :

PhonePe / Google Pay : ९८२२२६७१०१

खातेधारक : श्री. बाळासाहेब भिवाजी शेवाळे

टीप : वरील वैद्यकीय माहिती आणि आर्थिक मदतीचे आवाहन हे कुटुंबीयांनी दिलेल्या माहितीनुसार प्रसिद्ध करण्यात येत आहे