भाजपा महिला आघाडीच्या पाठपुराव्याला यश; शिरूर पोस्ट कार्यालयातील आधार सेवा केंद्र पुन्हा सुरू

शिरूर{ डेली न्यूज पोस्ट टीम- 24: }शिरूर येथील पोस्ट कार्यालयातील २०२३ पासून बंद असलेले आधार सेवा केंद्र अखेर पुन्हा सुरू करण्यात आले. भाजपा महिला आघाडीने केलेल्या पाठपुराव्यानंतर आणि पोस्ट विभागाच्या अधिकाऱ्यांसमोर प्रत्यक्ष परिस्थिती मांडल्यानंतर हा निर्णय घेण्यात आला.

भाजपा महिला आघाडीच्याप्रिया बिरादार यांनी सांगितले की पोस्ट कार्यालयातील आधार सेवा केंद्र बंद असल्याने नागरिकांना आधार कार्ड अद्ययावत करणे, दुरुस्ती करणे तसेच इतर सेवांसाठी खासगी केंद्रांचा आधार घ्यावा लागत होता. त्यामुळे शासनाने निश्चित केलेल्या शुल्कापेक्षा अधिक पैसे मोजावे लागत असल्याच्या तक्रारी सातत्याने प्राप्त होत होत्या. याप्रकरणी महिला आघाडीने यापूर्वी तहसील कार्यालय तसेच पोस्ट कार्यालयाकडे अनेक वेळा निवेदने देऊन सेवा केंद्र सुरू करण्याची मागणी केली होती.

दरम्यान, पुणे येथील पोस्ट विभागाचे अधीक्षक केतन शित्रे शिरूर दौऱ्यावर आले असता, महिला आघाडीच्या पदाधिकाऱ्यांनी पोस्ट कार्यालयातील परिस्थिती फोटो आणि व्हिडिओच्या माध्यमातून त्यांच्या निदर्शनास आणून दिली. त्यानंतर अधीक्षक शित्रे यांनी तात्काळ दखल घेत आधार सेवा केंद्र सुरू करण्याचे आदेश दिले.

यानंतर पोस्ट कार्यालयात आधार सेवा केंद्राचा फलक लावून सेवा पुन्हा सुरू करण्यात आली. त्यामुळे शिरूर शहर व परिसरातील नागरिकांना आता शासनाने निश्चित केलेल्या अधिकृत दरात आधार कार्डाशी संबंधित विविध सेवा उपलब्ध होणार आहेत.

दरम्यान, नागरिकांनी या सुविधेचा लाभ घ्यावा, असे आवाहन भाजपा महिला आघाडीच्या प्रिया बिरादार यांनी केले आहे .