शिरूरमध्ये आयआयसीईएस ‘ 2026’ राष्ट्रीय परिसंवाद; शाश्वत विकासासाठी नवोन्मेष व उद्योजकतेवर भर

शिरूर (डेली न्यूज पोस्ट टीम 24) :आर्थिक, सामाजिक आणि पर्यावरणीय आव्हानांच्या पार्श्वभूमीवर शाश्वत विकासाला गती देण्यासाठी नवोन्मेष, सहकार्य आणि उद्योजकतेचे महत्त्व अधोरेखित करणारा ‘IICES 2026 – Paving Way for Sustainable Growth’ हा राष्ट्रीय स्तरावरील एकदिवसीय परिसंवाद शनिवार, ३ जानेवारी २०२६ रोजी शिरूर येथील एस.एस.पी. मंडळाच्या चांदमल ताराचंद बोरा कला, वाणिज्य व विज्ञान महाविद्यालयात होणार आहे. हा परिसंवाद सावित्रीबाई फुले पुणे विद्यापीठाच्या सेंटर फॉर इनोव्हेशन इन इनकुबेशन अँड लिंकजेस Centre for Innovation, Incubation & Linkages यांच्या सहकार्याने आयोजित करण्यात आला आहे.

परिसंवादाचे उद्घाटन एस.एस.पी. मंडळाचे सचिव एन. एस. निकम यांच्या हस्ते होणार असून अध्यक्ष धरमचंदजी फुलफगर प्रमुख पाहुणे म्हणून उपस्थित राहणार आहेत. उद्घाटन सत्रात एमसीसीआयएचे कार्यकारिणी सदस्य डॉ. अनंत सरदेशमुख मुख्य वक्ते म्हणून मार्गदर्शन करणार आहेत. शाश्वत आर्थिक विकास, उद्योग–शिक्षण सहकार्य आणि उद्योजकतेतील संधी या विषयांवर ते आपले विचार मांडतील.

परिसंवादाचे नियोजन प्राचार्य डॉ. के. सी. मोहिते आणि इनक्यूबेटर पार्टनर डॉ. संदीप कडवे यांनी केले आहे. विद्यार्थ्यांच्या संशोधन, नवोन्मेष आणि उद्योजकतेला चालना देण्यासाठी महाविद्यालयात सातत्याने असे उपक्रम राबविले जात असल्याचे प्राचार्य डॉ. मोहिते यांनी सांगितले. या निमित्ताने स्टार्टअप सेलच्या माध्यमातून सुमारे ३५ स्टॉल्स उभारण्यात येणार असून त्यामध्ये विविध नवकल्पना, संशोधन प्रकल्प, स्टार्टअप संकल्पना आणि नाविन्यपूर्ण उत्पादने सादर केली जाणार आहेत.

संवाद, नवोन्मेष, सहकार्य, उद्योजकता आणि शाश्वत विकास ही परिसंवादाची मुख्य संकल्पना असून कृषीव्यवसाय, ग्रामीण तंत्रज्ञान, किरकोळ व्यवस्थापन, शाश्वत विकास, स्टार्टअप्स आणि निधी उभारणी (फंडिंग) या विषयांवर तज्ज्ञांचे मार्गदर्शन व चर्चासत्रे होणार आहेत. सावित्रीबाई फुले पुणे विद्यापीठ, एमआयटी–एडीटी विद्यापीठ, विविध संशोधन संस्था आणि उद्योग क्षेत्रातील तज्ज्ञांचा सहभाग राहणार आहे.

सकाळी ९.३० ते सायंकाळी ४.३० या वेळेत होणारा हा परिसंवाद विद्यार्थी, संशोधक, शिक्षक, उद्योजक आणि उद्योग प्रतिनिधींसाठी उपयुक्त ठरेल. परिसंवादाचे समन्वयक म्हणून डॉ. एन. एम. घनगावकर आणि डॉ. डी. एच. बोबडे कार्यरत असून उपप्राचार्य प्रा. एच. एस. जाधव यांचे विशेष सहकार्य लाभत आहे.