नोकरीच्या आमिषाने तरुणांची फसवणूक, दोघे ताब्यात

शिरूर { डेली न्यूज पोस्ट टीम 24}: रांजणगाव गणपती येथे नोकरी लावून देण्याच्या आमिषाने तरुणांकडून पैसे उकळून फसवणूक केल्याचा प्रकार उघडकीस आला आहे. या प्रकरणी पोलीस ठाण्यात गुन्हा दाखल करण्यात आला असून दोन जणांना ताब्यात घेण्यात आले आहे.

मुन्ना राजू शिंदे (वय २१, रा. पानमळा, शिर्डी, ता. राहता, जि. अहिल्यानगर) यांनी दिलेल्या फिर्यादीवरून हा गुन्हा दाखल झाला आहे. आरोपी अवध कलीम बिनसाद (रा. श्रीरामपूर), ज्ञानेश्वर महादेव धायतडक (रा. धायतडकवाडी, ता. पाथर्डी) आणि अमोल आवटे (पूर्ण नाव माहिती नाही, रा. श्रीरामपूर) यांनी एम.एस.एफ. फोर्स एजन्सीच्या नावाखाली नोकरी देण्याचे आमिष दाखवले.

दिनांक ३० डिसेंबर २०२५ रोजी रांजणगाव गावच्या हद्दीतील सुखकर्ता मंगल कार्यालय येथे हा प्रकार घडला. आरोपींनी फिर्यादी व त्याच्यासोबत असलेल्या एकूण ३७ मुले व १० मुलींना रांजणगाव एमआयडीसीतील कंपन्यांमध्ये  काम देतो, आठ तास काम व १६ हजार रुपये पगार देतो, असे सांगितले. त्यासाठी ड्रेस व किटच्या नावाखाली एकूण ७० हजार रुपये घेतले.

मात्र प्रत्यक्षात कोणालाही नोकरी न देता, पैसे परत मागितल्यावर आरोपींनी शिवीगाळ व दमदाटी करून पैसे देण्यास नकार दिला. अखेर फसवणूक झाल्याचे लक्षात आल्यानंतर फिर्यादीने पोलिसांकडे धाव घेतली.

या प्रकरणी भारतीय न्याय संहितेच्या (BNS) कलम ३१८(४), ३५१(२)(३), ३५२ व ३(५) अन्वये गुन्हा दाखल करण्यात आला आहे. आरोपींचा पूर्वभिलेख नसल्याची माहिती पोलिसांनी दिली. या प्रकरणी अधिक तपास पोलीस निरीक्षक महादेव वाघमोडे यांच्या मार्गदर्शनाखाली पोलीस हवालदार मोरे (१८४०) करत आहे