जिद्दीच्या जोरावर महाराष्ट्र लोकसेवा आयोगाची परीक्षा उत्तीर्ण होत अपूर्वा चव्हाण बनल्या कृषी अधिकारी.

शिरूर { डेली न्यूज पोस्ट टीम 24}: येथील अपूर्वा ज्ञानदेव चव्हाण यांनी महाराष्ट्र लोकसेवा आयोगाच्या (एमपीएससी) स्पर्धा परीक्षेत यश मिळवत कृषि अधिकारी पदावर निवड मिळवली आहे. त्यांच्या या यशामुळे शिरूर परिसरात आनंदाचे वातावरण निर्माण झाले असून सर्व स्तरांतून त्यांच्यावर अभिनंदनाचा वर्षाव होत आहे.

अपूर्वा या शैक्षणिक व सामाजिक वातावरणात वाढल्या. त्यांचे वडील ज्ञानदेव चव्हाण हे प्राथमिक शिक्षक असून आई वैशाली चव्हाण या तेजस्विनी फाउंडेशन या सेवाभावी संस्थेच्या अध्यक्षा आहेत. कुटुंबातील शैक्षणिक व सेवाभावी परंपरेचा ठसा त्यांच्या जडणघडणीत उमटला.

तसेच त्यांचे मामा अनिल कटके हे पोलीस उपअधीक्षक पदावर कार्यरत आहेत.

लहानपणापासून प्रशासकीय अधिकारी होण्याचे स्वप्न मनाशी बाळगलेल्या अपूर्वा यांनी त्या दिशेने सातत्यपूर्ण प्रयत्न केले. स्पर्धा परीक्षेच्या तयारीसाठी त्यांनी नियोजनबद्ध अभ्यास करत अनेक आव्हानांवर मात केली. “अपूर्वा हिला लहानपणापासून अधिकारी होण्याची जिद्द होती. रात्रंदिवस अभ्यास करून तिने हे स्वप्न साकार केले,” असे आई वैशाली चव्हाण यांनी सांगितले.

अपूर्वा यांचे प्राथमिक शिक्षण जिल्हा परिषद प्राथमिक शाळा गोलेगाव येथून झाले असून माध्यमिक शिक्षण

 विद्याधाम प्रशाला शिरूर येथे पूर्ण केले.त्यानंतर बी.टेक. चे शिक्षण अण्णासाहेब शिंदे ॲग्रीकल्चर इंजीनियरिंग अँड टेक्नॉलॉजी कॉलेज राहुरी या ठिकाणाहून पूर्ण केले.सध्या अपूर्वा या सहाय्यक सहकारी अधिकारी, पनवेल येथे कार्यरत आहे.

अपूर्वा यांच्या यशामुळे ग्रामीण भागातील विद्यार्थ्यांसाठी प्रेरणादायी उदाहरण निर्माण झाले आहे. परिश्रम, चिकाटी आणि कुटुंबीयांच्या पाठबळाच्या जोरावर त्यांनी यशाची शिखरे गाठल्याची भावना व्यक्त होत आहे.