गुरुपौर्णिमेनिमित्त शिरूरमध्ये गुरुजनांचा गौरव; शाळा, धार्मिक संस्था आणि सामाजिक उपक्रमांतून कृतज्ञतेची भावना व्यक्त

शिरूर{ डेली न्यूज पोस्ट टीम 24}गुरुपौर्णिमेनिमित्त शिरूर शहर व परिसरात विविध धार्मिक, शैक्षणिक व सामाजिक कार्यक्रम उत्साहात पार पडले. गुरु-शिष्य परंपरेचे महत्त्व अधोरेखित करत गुरुजनांप्रती कृतज्ञता व्यक्त करण्यात आली.

शिरूर शहरातील विविध शाळांमध्ये गुरुपौर्णिमेनिमित्त विशेष कार्यक्रमांचे आयोजन करण्यात आले. विद्यार्थ्यांनी आपल्या शिक्षकांना गुलाबपुष्प अर्पण करून त्यांचे आशीर्वाद घेतले. आई-वडील, शिक्षक, मार्गदर्शक आणि जीवनाला योग्य दिशा देणाऱ्या प्रत्येक व्यक्तीप्रती आदर व कृतज्ञता व्यक्त करण्यात आली.

डेक्कन एज्युकेशन सोसायटीच्या डेक्कन स्कूल, शिरूर येथे गुरुपौर्णिमेनिमित्त विद्यार्थ्यांकडून आपल्या आई-वडिलांचे पाद्यपूजन करण्यात आले. भारतीय संस्कृतीतील मातृ-पितृ पूजनाचे महत्त्व विद्यार्थ्यांना पटवून देणारा हा उपक्रम भावनिक वातावरणात पार पडला. यावेळी व्यासपीठावर रयत शिक्षण संस्थेतील निवृत्त शिक्षक व योगगुरू लक्ष्मण म्हस्के, विद्याधाम प्रशालेचे माजी मुख्याध्यापक व्ही. डी. कुलकर्णी, कृषी उत्पन्न बाजार समितीचे माजी संचालक विजयेंद्र गद्रे, शाळेच्या पालक-शिक्षक संघाच्या उपाध्यक्षा अश्विनी बोले तसेच शाळेचे प्राचार्य डॉ. समीर ओंकार यांची प्रमुख उपस्थिती होती.

दरम्यान, श्री स्वामी समर्थ सेवा संस्था, शिरूर यांच्या वतीने गुरुपौर्णिमा उत्सव भक्तिमय वातावरणात साजरा करण्यात आला. यानिमित्त श्री स्वामी समर्थ मिरवणूक, महाआरती आणि महाप्रसादाचे आयोजन करण्यात आले. मोठ्या संख्येने भाविकांनी उपस्थित राहून महाआरती व महाप्रसादाचा लाभ घेतला.

न्हावरा (ता. शिरूर) येथे गुरुपौर्णिमेनिमित्त आयोजित कार्यक्रमात माजी मुख्याध्यापक दत्तात्रेय राजे निंबाळकर यांचा विशेष सत्कार करण्यात आला. बोरा महाविद्यालयाच्या भूगोल विभागाचे माजी प्रमुख प्रा. चंद्रकांत धापटे यांच्या हस्ते, प्रा. सतीश धुमाळ यांच्या उपस्थितीत हा सन्मान करण्यात आला.  शिरूर येथे राष्ट्रपती पुरस्कार प्राप्त शिक्षक पुरस्कार प्राप्त माजी मुख्याध्यापक हरिभाऊ पानसरे यांचाही विशेष गौरव करण्यात आला.कार्यक्रमास ज्ञानगंगा एज्युकेशन संस्थेचे अध्यक्ष डॉ. प्रा. राजेराम घावटे, प्रा. चंद्रकांत धापटे, प्रा. सतीश धुमाळ प्राचार्य डॉ. समीर ओंकार आदी उपस्थित होते.

प्राचार्य महासंघाचे माजी अध्यक्ष तथा शिरूर शिक्षण प्रसारक मंडळचे सचिव नंदकुमार निकम व प्राचार्य डॉ. के. सी. मोहिते यांना ही गुरुपौर्णिमेनिमित्त सन्मानित करण्यात आले.

यावेळी शिरूर नगरपरिषद शिक्षण मंडळाचे माजी अध्यक्ष सुभाष पवार, शिरूर शिक्षण प्रसारक मंडळचे राजेंद्र भटेवरा, यशवंतराव चव्हाण महाराष्ट्र मुक्त विद्यापीठाच्या बोरा महाविद्यालयातील अभ्यासकेंद्राचे केंद्र संयोजक प्रा. डॉ. अंबादास केत, प्रा. चंद्रकांत धापटे, संजय देशपांडे, प्राचार्य डॉ. समीर ओंकार, केंद्र सहा य्यक निळोबा भोगावडे,काशिनाथ काळे, मुख्याध्यापक पाचुंदकर आदी उपस्थित होते. गुरुपौर्णिमेच्या निमित्ताने गुरुंचे स्थान सर्वोच्च असून त्यांच्या मार्गदर्शनातूनच समाजाची जडणघडण घडते, असा संदेश विविध कार्यक्रमांतून देण्यात आला.