शिरूर { डेली न्यूज पोस्ट टीम 24}: शिरूर तालुक्यातील न्हावरा येथील तांबे-तरटे वस्ती परिसरात गुरुवारी (दि. ३०) पहाटे वनविभागाने लावलेल्या पिंजऱ्यात बिबटया जेरबंद झाला. सुमारे सहा वर्षांचा नर बिबट पहाटेच्या सुमारास पिंजऱ्यात अडकल्याची माहिती तालुका वनाधिकारी निळकंठ गव्हाणे यांनी दिली.

गेल्या काही दिवसांपासून न्हावरा परिसरात बिबट्याचा वावर वाढल्याने ग्रामस्थांमध्ये भीतीचे वातावरण निर्माण झाले होते. याच पार्श्वभूमीवर वनविभागाने तांबे-तरटे वस्ती परिसरात पिंजरा लावला होता. गुरुवारी पहाटे बिबट पिंजऱ्यात अडकल्यानंतर वनविभागाच्या कर्मचाऱ्यांनी घटनास्थळी धाव घेत सुरक्षितरीत्या त्याचा ताबा घेतला.

त्यानंतर या नर बिबट्याला वैद्यकीय तपासणीनंतर जुन्नर तालुक्यातील माणिकडोह बिबट बचाव केंद्राकडे पुढील देखभाल आणि आवश्यक प्रक्रियेसाठी रवाना करण्यात आल्याचे गव्हाणे यांनी सांगितले.

दरम्यान, यापूर्वी डिसेंबर २०२५ पासून शिरूर तालुक्यातील विविध भागांत वनविभागाने ८५ बिबटे पकडून माणिकडोह बचाव केंद्रात स्थलांतरित केले आहेत.

मागील आठवड्यात पिंपळसुटी येथे बिबट्याने केलेल्या हल्ल्यात चिमुकलीस प्राण गमावावे लागल्याची घटना घडली होती.

न्हावरा परिसरात पुन्हा बिबट जेरबंद झाल्याने नागरिकांनी दिलासा व्यक्त केला असला, तरी शेतकरी व ग्रामस्थांनी शेतात तसेच रात्रीच्या वेळी सावधगिरी बाळगावी.