शिरूर मध्ये आज ८ एप्रिलला प्रबोधन संमेलन

शिरूर{ डेली न्यूज पोस्ट टीम 24}बहुजन महापुरुष व महानायिका सामूहिक जयंती महोत्सव समिती, शिरूर यांच्या वतीने तसेच भारत मुक्ती मोर्चा व राष्ट्रीय ओबीसी (पिछडा वर्ग) मोर्चा यांच्या सहयोगाने बुधवार, ८ एप्रिल २०२६ रोजी बहुजन जयंती उत्सवानिमित्त प्रबोधन संमेलनाचे आयोजन करण्यात आले आहे.

या संमेलनाचे उद्घाटन शिरूर नगरपरिषदेच्या नगराध्यक्षा सौ. ऐश्वर्या पाचर्णे यांच्या हस्ते होणार आहे. तर ‘अद्वितीय छत्रपती संभाजी महाराज’ या ऐतिहासिक ग्रंथाचे लेखक इतिहासाचार्य अॅड. अनंत दारवटकर हे प्रमुख मार्गदर्शक म्हणून उपस्थित राहणार आहेत.

कार्यक्रमाला मुख्य अतिथी म्हणून अॅड. जितेंद्रसिंह शेखावत (प्रदेश विधी सल्लागार, क्षत्रिय मूलनिवासी महासंघ, राजस्थान) तसेच अलादीन खान कायमखानी (राष्ट्रीय सचिव, क्षत्रिय मूलनिवासी महासंघ, नवी दिल्ली) उपस्थित राहणार असल्याची माहिती आयोजकांनी दिली आहे. संमेलनाच्या अध्यक्षस्थानी भारत मुक्ती मोर्चाचे राष्ट्रीय अध्यक्ष वामन मेश्राम राहणार आहेत.

दरम्यान, सायंकाळी ५ वाजता शिरूर मार्केट यार्ड येथील छत्रपती शिवाजी महाराजांच्या पुतळ्यास पुष्पहार अर्पण करून कार्यक्रमाची सुरुवात होणार आहे. त्यानंतर बहुजन महापुरुषांच्या सन्मानार्थ मिरवणूक काढण्यात येणार असून, नम्रता हॉटेल चौक, शिरूर नगरपरिषद व्यापारी संकुलासमोर आयोजित प्रबोधन संमेलनाने कार्यक्रमाची सांगता होणार आहे.

या कार्यक्रमास बहुसंख्य नागरिकांनी उपस्थित राहावे, असे आवाहन आयोजकांनी केले आहे.