शिरूरमध्ये रस्त्यावर प्रसूतीप्रकरणी संताप : आरोग्य अधिकाऱ्यांवर कारवाईची जनता दल धर्मनिरपेक्षेचे प्रदेशाध्यक्ष नाथा शेवाळे यांची मागणी

शिरूर{ डेली न्यूज पोस्ट टीम 24}: शिरूर शहरातील निर्माण प्लाझा परिसरात घडलेल्या रस्त्यावर प्रसूतीच्या घटनेने तालुक्यात तीव्र संताप व्यक्त होत असून, संबंधित शासकीय आरोग्य अधिकाऱ्यांवर  कारवाई करण्याची मागणी जोर धरू लागली आहे. या संदर्भात जनता दल (सेक्युलर) महाराष्ट्राचे प्रदेशाध्यक्ष नाथाभाऊ हरिभाऊ शेवाळे यांनी राज्याचे आरोग्यमंत्री प्रकाश आबिटकर यांना निवेदन सादर केले आहे.

दि. २५ एप्रिल रोजी घडलेल्या या घटनेत एका गरीब गरोदर महिलेला प्रसूती वेदना असह्य झाल्याने रस्त्यावरच बाळाला जन्म द्यावा लागला. परिसरातील महिलांनी तसेच डॉ. सुनिता पोटे यांनी तत्परता दाखवत साड्यांचा आडोसा करून सुरक्षित प्रसूती घडवून आणली. मात्र, संबंधित महिलेच्या म्हणण्यानुसार, शासकीय आरोग्य यंत्रणेकडून सेवा नाकारण्यात आल्यानेच ही वेळ ओढवली.

या घटनेमुळे शिरूरमधील शासकीय आरोग्य व्यवस्थेवर गंभीर प्रश्नचिन्ह उपस्थित झाले आहे. “पुरोगामी महाराष्ट्रात अशा प्रकारची घटना घडणे ही लाजिरवाणी बाब असून, यामुळे प्रशासनाच्या निष्काळजीपणाचे दर्शन घडते,” असे निवेदनात नमूद करण्यात आले आहे.

पुढे अशा घटना घडू नयेत यासाठी जबाबदार अधिकारी व कर्मचाऱ्यांवर तातडीने चौकशी करून कठोर कारवाई करावी, तसेच गरीब व सामान्य महिलांना प्रसूतीसारख्या अत्यावश्यक सेवांपासून वंचित ठेवू नये, अशी मागणीही करण्यात आली आहे.