शिरूर नगर परिषदेकडे ‘मिनी रेस्क्यू टेंडर’ दाखल ; आपत्कालीन सेवांना मिळणार बळ

शिरूर { डेली न्यूज पोस्ट टीम- 24} : शहरातील वाढती लोकसंख्या, दाट वस्त्या आणि आपत्कालीन परिस्थिती लक्षात घेऊन शिरूर नगर परिषदेकडून अग्निशमन व बचाव व्यवस्थेत महत्त्वाची भर घालण्यात आली आहे. आमदार ज्ञानेश्वर माऊली कटके यांच्या प्रयत्नातून नगर परिषदेकडे अत्याधुनिक सुविधांनी सुसज्ज असे आणखी एक ‘मिनी रेस्क्यू टेंडर’ वाहन दाखल झाले असून त्यामुळे आपत्कालीन प्रतिसाद यंत्रणा अधिक सक्षम होणार आहे.

अरुंद रस्ते, दाट लोकवस्ती आणि तत्काळ मदतीची आवश्यकता असलेल्या ठिकाणी हे वाहन विशेष उपयुक्त ठरणार आहे. आग, अपघात, नैसर्गिक आपत्ती तसेच बचाव मोहिमांमध्ये या वाहनाचा प्रभावी वापर होणार असल्याचे नगर परिषद प्रशासनाकडून सांगण्यात आले.

या मिनी रेस्क्यू टेंडरमध्ये अपघातग्रस्त वाहनांमध्ये अडकलेल्या व्यक्तींना सुरक्षित बाहेर काढण्यासाठी हायड्रोलिक कटर आणि स्प्रेडरची सुविधा देण्यात आली आहे. तसेच जखमींना तातडीने हलविण्यासाठी फोल्डिंग स्ट्रेचर आणि उंच ठिकाणांवर किंवा खोल दरीत अडकलेल्या व्यक्तींच्या सुटकेसाठी विशेष दोऱ्यांची व्यवस्था करण्यात आली आहे.

आग विझवण्यासाठी वाहनामध्ये उच्च दाबाची होज रील, प्रगत पंप यंत्रणा आणि फोम सिस्टीम बसविण्यात आली आहे. पेट्रोल, डिझेल किंवा रासायनिक पदार्थांमुळे लागलेल्या आगीवर नियंत्रण मिळवण्यासाठी ही यंत्रणा प्रभावी ठरणार आहे. मोठ्या अग्निशमन वाहनांना पोहोचता न येणाऱ्या ठिकाणी हे मिनी टेंडर तातडीने दाखल होऊ शकणार आहे.

वाहनामध्ये प्रथमोपचारासाठी आवश्यक साहित्यही उपलब्ध करून देण्यात आले आहे. त्यामुळे रुग्णवाहिका येण्यापूर्वी जखमींवर प्राथमिक उपचार करणे शक्य होणार आहे. याशिवाय बंद दरवाजे, अडथळे किंवा ढिगारा हटविण्यासाठी कुऱ्हाड, हातोडा आणि क्रोबारसारखी अवजड साधनेही ठेवण्यात आली आहेत.

नगर परिषदेकडून नागरिकांच्या सुरक्षेसाठी आधुनिक यंत्रणांवर भर दिला जात असून नव्याने दाखल झालेल्या या मिनी रेस्क्यू टेंडरमुळे शहरातील आपत्कालीन सेवा अधिक गतिमान आणि प्रभावी होणार असल्याची भावना नागरिकांकडून व्यक्त होत आहे. या वाहनाचे लोकार्पण नगराध्यक्ष ऐश्वर्या अभिजित पाचर्णे यांच्या हस्ते करण्यात आले. यावेळी उपनगराध्यक्ष मितेश  गादिया,बांधकाम समितीचे सभापती सुनील जाधव , स्वच्छता वैद्यकीय व सार्वजनिक आरोग्य समितीचे सभापती एजाज अन्सार बागवान, महिला व बालकल्याण समितीचे उपसभापती स्वप्नाली योगेश जामदार, नगरसेविका संगीता महेन्द्र मल्लाव, चारुशिला कोळपकर , नगरसेवक निलेश केरू गाडेकर, संतोष प्रभाकर थेऊरकर, सागर त्रिंबक नरवडे, अभिजित गणेश पाचर्णे,यांच्यासह प्रशासकीय अधिकारी राहुल पिसाळ, सचिन वाळूंज, अग्निशमन अधिकारी, महेश कदम, आदी उपस्थित होते.