अमृत महोत्सवी वाढदिवसानिमित्ताने प्रसिद्ध हलवाई शरद मुसळे यांचा मानपत्र देऊन विशेष सन्मान

शिरूर { डेली न्यूज पोस्ट टीम -24}अध्यात्मिक विचार, गणेशभक्ती, सामाजिक बांधिलकी आणि निस्वार्थी वृत्ती यामुळे समाजात वेगळी ओळख निर्माण केलेले प्रसिद्ध हलवाई शरद मुसळे यांचा अमृत महोत्सवी वाढदिवसानिमित्त श्रीमंत हलवाई चौक गणेश मंडळाच्या वतीने सन्मानपत्र देऊन विशेष गौरव करण्यात आला.

यावेळी मुसळे यांच्या मितभाषी स्वभावाचा, प्रसिद्धीपासून दूर राहून केलेल्या सामाजिक कार्याचा तसेच माणुसकी जपणाऱ्या त्यांच्या जीवनप्रवासाचा गौरव उपस्थितांनी केला. अत्यंत प्रतिकूल परिस्थितीत अथक परिश्रम, प्रामाणिकपणा, सचोटी आणि शिस्त यांच्या जोरावर त्यांनी व्यवसाय उभारला. ग्राहकांशी आत्मीयतेचे नाते आणि गुणवत्तेची जपणूक यामुळे त्यांनी स्वतःचे स्वतंत्र स्थान निर्माण केल्याचे मान्यवरांनी सांगितले.

पत्नीच्या अकस्मात निधनासारखा मोठा आघात सहन करूनही त्यांनी धैर्याने प्रत्येक संकटावर मात केली. मुलगा प्रेम मुसळे यांच्या सहकार्याने व्यवसाय अधिक उंचीवर नेत कष्ट, संयम आणि जिद्दीचा आदर्श समाजासमोर निर्माण केल्याच्या भावना यावेळी व्यक्त करण्यात आल्या.

कार्यक्रमाला हलवाई चौक गणेश मित्र मंडळाचे अध्यक्ष अशोक काळे, माजी अध्यक्ष अविनाश जाधव, रणजित गायकवाड, शरद परदेशी, बाबूशेठ पुजारी, प्रणव मुसळे, तर्डोबावाडीचे माजी उपसरपंच गणेश खोले, बांधकाम साहित्य व्यावसायिक अतुल बोथरा, भाजप पदाधिकारी विजय नरके, प्रेम मुसळे आदी उपस्थित होते.

अतुल बोथरा, अविनाश जाधव आणि प्रा. सतीश धुमाळ यांनी मनोगत व्यक्त केले. स्वागत अशोक काळे यांनी, तर आभार वृषाली प्रेम मुसळे यांनी मानले.