शिरूर परिसरात महिलांच्या गळ्यातील सोनसाखळी हिसकावून पसार होणाऱ्या सराईत चोरट्याला अटक

शिरूर { डेली न्यूज पोस्ट टीम 24}शिरूर परिसरात महिलांच्या गळ्यातील सोनसाखळी हिसकावून पसार होणाऱ्या सराईत चोरट्याला स्थानिक गुन्हे शाखेच्या पथकाने अटक करून तीन सोनसाखळी चोरीचे गुन्हे उघडकीस आणले आहेत. आरोपीकडून २५ ग्रॅम वजनाचे सोन्याचे दागिने, चोरीसाठी वापरलेली दुचाकी असा सुमारे चार लाख रुपयांचा मुद्देमाल जप्त करण्यात आला आहे.

दि. १६ मे रोजी सकाळी बाबुरावनगर येथील ज्ञानगंगा अभ्यासिकेसमोरून पायी जात असताना राधाबाई किसन कडीले यांच्या गळ्यातील ९ ग्रॅम ५७० मिलीग्रॅम वजनाची, सुमारे ३९ हजार ५९५ रुपये किमतीची सोन्याची पोत अज्ञात दुचाकीस्वाराने हिसकावून नेली होती. याप्रकरणी शिरूर पोलीस ठाण्यात गुन्हा दाखल करण्यात आला होता.

या गुन्ह्याचा समांतर तपास स्थानिक गुन्हे शाखेने सुरू केला. घटनास्थळ परिसरातील सीसीटीव्ही फुटेजची तपासणी केली असता, शाईन मोटारसायकलवरून आलेल्या व्यक्तीने चोरी केल्याचे निष्पन्न झाले. फुटेजच्या आधारे तसेच गोपनीय माहितीच्या मदतीने संशयिताची ओळख ज्ञानेश्वर वसंत काळे (रा. बाफनामळा, बाबुरावनगर, शिरूर) अशी पटली.l

पथकाने आरोपीचा शोध घेऊन मलठण परिसरात सापळा रचला. २५ मे रोजी त्याला ताब्यात घेण्यात आले. चौकशीदरम्यान त्याने सोनसाखळी चोरीचे गुन्हे केल्याची कबुली दिली. अधिक तपासात शिरूर व नारायणगाव पोलीस ठाण्यांच्या हद्दीतील आणखी दोन गुन्ह्यांची उकल झाली.

पोलीसांनी आरोपीकडून २५ ग्रॅम सोन्याचे दागिने, चोरीसाठी वापरलेली शाईन मोटारसायकल असा सुमारे चार लाख रुपयांचा मुद्देमाल जप्त केला आहे. ज्ञानेश्वर काळे हा रेकॉर्डवरील सराईत आरोपी असून त्याच्यावर यापूर्वीही मालमत्तेविरुद्धचे गुन्हे दाखल असल्याची माहिती पोलीसांनी दिली.

ही कारवाई पुणे ग्रामीणचे पोलीस अधीक्षक संदीप सिंह गिल, अपर पोलीस अधीक्षक शुभमकुमार आणि उपविभागीय पोलीस अधिकारी प्रशांत ढोले यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर तसेच पोलीस अंमलदार तुषार पंदारे, जनार्दन शेळके, राजू मोमीन, संजू जाधव आणि सागर धुमाळ यांच्या पथकाने केली.