दशक्रिया घाट मार्गावरील अतिक्रमणांवर नगरपरिषदेची कारवाई; अतिक्रमणविरोधी पथकाची स्थापना

शिरूर{ डेली न्यूज पोस्ट टीम 24}: शहरातील सार्वजनिक रस्ते अतिक्रमणमुक्त करण्यासाठी शिरूर नगरपरिषदेने अतिक्रमणविरोधी मोहिमेला अधिक गती दिली असून, आज १ जून रोजी हलदी मोहल्ल्यातील दशक्रिया घाटाकडे जाणाऱ्या रस्त्यावरील अतिक्रमणांवर कारवाई करण्यात आली.

  नगरपरिषदेने अतिक्रमणांवर प्रभावी नियंत्रणासाठी कायमस्वरूपी अतिक्रमणविरोधी पथक स्थापन केले असल्याचे मुख्याधिकारी प्रीतम पाटील यांनी सांगितले.

        मुख्याधिकारी प्रितम पाटील यांच्या मार्गदर्शनाखाली ही मोहीम राबविण्यात आली. याबाबत माहिती देताना पाटील यांनी सांगितले की, शहरातील अतिक्रमणांवर सातत्याने लक्ष ठेवण्यासाठी आठ सदस्यीय विशेष पथक तयार करण्यात आले आहे. या पथकाचे प्रमुख नगर अभियंता असतील, तर बांधकाम अभियंता सहाय्यक म्हणून काम पाहणार आहेत.

दशक्रिया घाटाकडे जाणारा रस्ता १५ मीटर रुंदीचा असून, रस्त्याच्या हद्दीत आलेल्या अतिक्रमणांवर कारवाई करण्यात आली. या कारवाईदरम्यान कोणताही अनुचित प्रकार घडू नये यासाठी पोलिस निरीक्षक संदेश केंजळे यांच्या नियंत्रणाखाली महिला व पुरुष पोलिसांचा कडेकोट बंदोबस्त तैनात करण्यात आला होता.

मोहिमेत प्रशासकीय अधिकारी राहुल पिसाळ, नगर अभियंता समाधान मुंगसे, रचना सहाय्यक पंकज काकड, पाणीपुरवठा अभियंता आदित्य बनकर, स्वच्छता निरीक्षक दत्तात्रेय बर्गे, कर निरीक्षक माधव गाजरे यांच्यासह शंभरहून अधिक कर्मचारी सहभागी झाले होते.

यापूर्वीही पाबळ फाटा ते बी. जे. कॉर्नर, बी. जे. कॉर्नर ते तहसील कार्यालय मार्ग, सी. टी. बोरा कॉलेज रोड, रेव्हेन्यू कॉलनी परिसर तसेच सेंटर दवाखाना परिसरातील प्रमुख रस्त्यांवर स्वतंत्र पथकांमार्फत एकाच वेळी कारवाई करण्यात आली होती. जेसीबी, ट्रॅक्टर, अग्निशमन वाहन आणि आवश्यक मनुष्यबळाच्या सहाय्याने ही मोहीम राबविण्यात आली.

शहराचे सुशोभीकरण, वाहतूक सुरळीत ठेवणे आणि सार्वजनिक जागा अतिक्रमणमुक्त राखणे ही नगरपरिषदेची प्राथमिक जबाबदारी असल्याचे सांगत मुख्याधिकारी प्रितम पाटील यांनी अशा मोहिमा पुढेही नियमितपणे सुरू राहणार असल्याचे स्पष्ट केले. नागरिकांनी पुन्हा अतिक्रमण न करता प्रशासनाला सहकार्य करावे, असे आवाहनही त्यांनी केले.