ग्रामीण भागाची जीवनवाहिनी असलेल्या एसटीच्या ७८व्या वर्धापनदिन शिरूरमध्ये उत्साहात साजरा

शिरूर{ डेली न्यूज पोस्ट टीम 24}: ग्रामीण भागातील नागरिकांसाठी एसटी ही केवळ वाहतुकीचे साधन नसून जीवनवाहिनी आहे. प्रवासी वाहतूक वाढविण्यासाठी अधिकारी, कर्मचारी आणि नागरिकांनी एकत्रित प्रयत्न करणे आवश्यक असल्याची भावना महाराष्ट्र राज्य मार्ग परिवहन महामंडळाच्या (एसटी) ७८व्या वर्धापनदिनानिमित्त शिरूर बसस्थानकात आयोजित कार्यक्रमात व्यक्त करण्यात आली.

राज्यातील पहिली एसटी बस १ जून १९४८ रोजी पुणे–अहिल्यानगर मार्गावर धावली होती. त्यानिमित्त दरवर्षी १ जून हा दिवस एसटीचा वर्धापनदिन म्हणून साजरा केला जातो. यंदाही शिरूर बसस्थानकात विविध उपक्रमांचे आयोजन करण्यात आले होते.वर्धापनदिनानिमित्त बसस्थानक परिसराची स्वच्छता करून आकर्षक सजावट करण्यात आली होती. रांगोळ्या, फुलांची आरास, तोरणे आणि फुलमाळांनी सजविलेल्या एसटी बसमुळे परिसरात उत्सवी वातावरण निर्माण झाले होते. ज्येष्ठ प्रवाशांच्या हस्ते केक कापून वर्धापनदिन साजरा करण्यात आला. यानंतर प्रवाशांना पेढे, बर्फी तसेच गुलाबपुष्पांचे वाटप करण्यात आले.

यावेळी आगार व्यवस्थापक मनीषा गायकवाड यांनी शिरूर आगाराच्या कामकाजाची माहिती देताना सांगितले की, शिरूर बसस्थानकात २५० हून अधिक कर्मचारी कार्यरत असून दररोज १९३ बसगाड्या विविध मार्गांवर धावतात. तसेच सुमारे ३ हजार विद्यार्थी-विद्यार्थिनी एसटीच्या सवलतीच्या प्रवास योजनेचा लाभ घेत आहेत. अधिकाधिक नागरिकांनी सुरक्षित, किफायतशीर आणि विश्वासार्ह असलेल्या एसटी सेवेला प्राधान्य द्यावे, असे आवाहन त्यांनी केले.

प्रा. सतीश धुमाळ यांनी एसटी ही सुरक्षित प्रवासाची हमी देणारी सेवा असून ग्रामीण भागाच्या सामाजिक आणि आर्थिक विकासात तिचे योगदान महत्त्वपूर्ण असल्याचे सांगितले.

या कार्यक्रमास वाहतूक निरीक्षक एन. बी. हवालदार, सहाय्यक वाहतूक निरीक्षक आर. बी. लंके, वाहतूक नियंत्रक डी. जी. दहिफळे, भरत माने, माधव मुंडे, चंद्रकांत वेताळ, सुनील देवरे, समीर झगडे, बाबू भोसले, वाहन परीक्षक सुनील जगताप, गणेश खटके, बापू फलके, वैशाली दांडेकर, आदर्श गंगावणे, सुजाता साबळे आदी उपस्थित होते.

कार्यक्रमाचे सूत्रसंचालन माधव मुंडे यांनी केले, तर समीर झगडे यांनी आभार मानले.