आंदोलनास पाठिंबा दिल्याच्या कारणावरून कामगारांना कमी केले तर मनसे स्टाईल आंदोलन; महिबूब सय्यद यांचा इशारा

शिरूर { डेली न्यूज पोस्ट टीम 24}: शिरूर नगरपरिषदेसमोर सुरू असलेल्या आमरण उपोषणाला पाठिंबा दिल्याच्या कारणावरून ठेक्यावरील सफाई कामगारांना कामावरून कमी करण्याचा प्रयत्न झाल्यास महाराष्ट्र नवनिर्माण सेनेच्या शैलीत तीव्र आंदोलन छेडण्यात येईल, असा स्पष्ट इशारा उपोषणकर्ते व मनसेचे जिल्हा उपाध्यक्ष महिबूब सय्यद यांनी दिला. ठेक्यावरील सफाई कामगारांच्या न्याय्य हक्कासाठी आपण ठामपणे त्यांच्या पाठीशी असल्याची ग्वाहीही त्यांनी दिली.

महिबूब सय्यद हे १३ जुलैपासून शिरूर नगरपरिषदेसमोर नगरपरिषदेच्या कथित मनमानी, भ्रष्टाचार आणि गलथान कारभाराविरोधात आमरण उपोषण करत आहेत. मंगळवारी घंटागाडी (घनकचरा संकलन) विभागातील पुरुष कामगारांनी त्यांच्या आंदोलनाला जाहीर पाठिंबा दिल्यानंतर बुधवारी सकाळी ठेक्यावरील महिला कामगारांनीही उपोषणस्थळी भेट देत समर्थन व्यक्त केले.

उपोषणाद्वारे सय्यद यांनी नगरपरिषदेतील विविध नागरी प्रश्नांसह कथित भ्रष्टाचार, विकासकामांतील अनियमितता, खड्ड्यांतील प्लास्टिक, पुठ्ठे, रिकाम्या बाटल्या व फाटके कपडे यांची निविदेशिवाय विल्हेवाट लावल्याप्रकरणी संबंधित ठेकेदारावर गुन्हा दाखल करणे, सार्वजनिक मालमत्तेचे नुकसान करणाऱ्यांवर कारवाई, सफाई कामगारांना ‘श्रमसाफल्य’ योजनेअंतर्गत तातडीने घरे उपलब्ध करून देणे, गौण खनिज उत्खनन प्रकरणी दंड वसूल करणे, किमान वेतन कायद्याचे उल्लंघन करणाऱ्या ठेकेदाराला काळ्या यादीत टाकणे तसेच शहरातील धोकादायक विद्युत वाहिन्या हटविणे अशा विविध मागण्या प्रशासनासमोर मांडल्या आहेत.

यावेळी घंटागाडीवरील ठेक्यावरील कामगारांनीही आपल्या प्रलंबित प्रश्नांकडे लक्ष वेधले. किमान वेतन कायद्यानुसार वेतन लागू करावे, थकीत वेतन त्याच निकषांनुसार अदा करावे, दर महिन्याचे वेतन १५ तारखेपूर्वी नियमित मिळावे तसेच कामावरून कमी करण्यात आलेल्या कामगारांना तातडीने पुन्हा सेवेत घ्यावे, अशा प्रमुख मागण्या त्यांनी केल्या.

कामगारांनी सांगितले की, सध्या किमान वेतन कायद्यानुसार वेतन मिळत नसून मिळणारा पगारही वेळेवर होत नाही. त्यामुळे आर्थिक अडचणींना सामोरे जावे लागत आहे. मागण्या मान्य होईपर्यंत आंदोलन सुरू ठेवण्याचा निर्धार त्यांनी व्यक्त केला.

आंदोलनाला पाठिंबा दिल्याच्या कारणावरून कोणत्याही कामगारावर कारवाई करू नये किंवा त्यांना कामावरून कमी करू नये, अशी मागणीही कामगारांनी केली. अन्यथा आंदोलन आणखी तीव्र करण्याचा इशाराही त्यांनी दिला.

दरम्यान, शिरूर नगरपरिषदेच्या पाणीपुरवठा समितीच्या सभापती डॉ. सुनीता पोटे यांनी आंदोलनाला पाठिंबा देत ठेक्यावरील कामगारांवर अन्याय होऊ देणार नसल्याची भूमिका मांडली. शिरूर प्रवासी संघाचे अनिल बांडे यांनीही ठेक्यावरील कामगारांना किमान वेतन कायद्यानुसार वेतन मिळालेच पाहिजे, अशी मागणी केली.

यावेळी नगरसेविका संगीता राजापूरे, आम्ही शिरूरकर फाउंडेशनचे रवींद्र सानप आदींनीही मनोगत व्यक्त करून कामगारांच्या न्याय्य मागण्यांना पाठिंबा जाहीर केला