शिरूर ते रामलिंग पर्यत नेण्यात येणार कावडी द्वारे जल

शिरूर : श्रावण महिन्याच्या पहिल्या सोमवारनिमित्त शिरूरच्या घोडनदीचे पवित्र जल कावडीद्वारे आणून प्रभू श्री रामलिंग महाराजांचा अभिषेक करण्याचा  उपक्रम शिवभक्तांकडून आयोजित करण्यात आला आहे.

यासंदर्भात  आयोजक संतोषभाऊ गवळी यांनी सांगितले की शिरूरमधून वाहणारी घोडनदी पवित्र नदी मानली जाते. या नदीच्या तीरावरून कावडीमध्ये जल भरून ते रामलिंग मंदिरापर्यंत पायी आणण्यात येणार आहे. यासाठी पहाटे दोन वाजता शिवभक्त घोडनदीच्या तीरावर एकत्र येणार असून, गंगापूजनानंतर कावडीत पवित्र जल भरले जाणार आहे. उपक्रमाचे आयोजक संतोषभाऊ गवळी, सदानंद लांडे, शिवभक्त धोत्रे मिस्तरी, शिवभक्त वाळुंज, सचिन क्षीरसागर, पठारे साहेब, शिवभक्त चंद्रकांत घावटे (मामा) यांच्यासह रामलिंगप्रेमी व शिवभक्तपहाटे अडीच वाजता कावड घेऊन रामलिंग मंदिराकडे प्रस्थान करतील. सुमारे चार किलोमीटरची ही पायी वारी ‘बम बम भोले’ रामलिंग महाराज की जय च्या जयघोषात आणि भक्तिमय वातावरणात पार पडणार आहे.मंदिरात कावड पोहोचल्यानंतर घोडनदीच्या पवित्र जलाने प्रभू रामलिंग महाराजांचा अभिषेक करण्यात येणार असून, त्यानंतर आरती होईल.

विशेष म्हणजे, हा उपक्रम केवळ पहिल्या सोमवारपुरता मर्यादित न ठेवता श्रावणातील चारही सोमवारी करण्याचा संकल्प आयोजकांनी केला आहे. या धार्मिक उपक्रमात शिरूर शहर व परिसरातील भाविकांनी मोठ्या संख्येने सहभागी व्हावे, असे आवाहन आयोजकांनी केले आहे.