रस्त्यावर मृत्यू, प्रशासन सुस्त! शिरूर बायपासवरील अपघातांविरोधात तिरडी आंदोलन

शिरूर { डेली न्यूज पोस्ट टीम 24}पुणे–अहिल्यानगर महामार्गावरील शिरूर बायपास परिसरात सातत्याने होत असलेल्या अपघातांमध्ये निष्पाप नागरिकांचे बळी जात असतानाही आवश्यक उपाययोजनांकडे प्रशासनाचे दुर्लक्ष होत असल्याचा आरोप करत नागरिकांनी तीव्र आंदोलन केले. “जनतेचे दुःख दिसत नसेल तर प्रत्यक्ष पहा” असा संतप्त संदेश देत आंदोलकांनी प्रशासनाचे लक्ष वेधले.

शिरूर बायपाससह पुणे–अहिल्यानगर मार्गावरील धोकादायक ठिकाणे, अनधिकृत कट, दुभाजक फोडून निर्माण करण्यात आलेले प्रवेशमार्ग, अपुऱ्या सुरक्षा उपाययोजना आणि वाहतूक नियोजनाचा अभाव यामुळे अपघातांचे प्रमाण वाढत आहे. मागील काही दिवसांत शिरूर बायपास परिसरात झालेल्या अपघातांत अनेकांना जीव गमवावा लागल्याने नागरिकांमध्ये तीव्र संताप आहे.

या पार्श्वभूमीवर शिरूर तहसील कार्यालयाचा आवारात मागील ६ दिवसापासून बेमुदत आंदोलन करीत असलेले सामाजिक कार्यकर्ते निलेश वाळुंज यांच्या आंदोलन स्थळी अपघातांत हकनाक जीव गमावलेल्या नागरिकांच्या स्मरणार्थ प्रतीकात्मक तिरडी ठेवण्यात आली. या माध्यमातून संबंधित प्रशासनाच्या उदासीनतेचा निषेध करण्यात आला.

शिरूर बायपासवरील अपघातप्रवण ठिकाणांचे तातडीने सर्वेक्षण करून रोड सेफ्टी ऑडिट करावे, धोकादायक ठिकाणी आवश्यक सुरक्षा उपाययोजना कराव्यात, अनधिकृत प्रवेशमार्ग बंद करावेत, दुभाजकांची दुरुस्ती करावी तसेच वाहतुकीचे योग्य नियोजन करावे, अशी मागणी निलेश वाळुंज यांनी केली आहे.

“अपघात झाल्यानंतर पंचनामा आणि मदत करण्यापेक्षा अपघात होऊच नयेत यासाठी प्रशासनाने ठोस पावले उचलण्याची गरज आहे. आणखी किती जीव गेल्यानंतर प्रशासन जागे होणार?” असा सवाल तिरडी आंदोलनाच्या वेळी सामाजिक कार्यकर्ते प्रितेश फुलडाळे, डॉ. वैशाली साखरे व सविता बोरुडे यांनी उपस्थित केला.

या आंदोलनात मोठ्या संख्येने नागरिक सहभागी झाले होते. शिरूर बायपासवरील अपघातांचा प्रश्न केवळ वाहतुकीचा नसून नागरिकांच्या जीविताशी निगडित असल्याने तातडीने कायमस्वरूपी उपाययोजना करण्याची मागणी यावेळी करण्यात आली.

 दरम्यान निलेश वाळुंज यांच्या आंदोलनास शिरूर ग्रामीणच्या सरपंच शिल्पा गायकवाड, उपसरपंच संजय शिंदे व बाबाजी वर्पे यांनी भेट देऊन पाठींबा दिला.