शेतातील कांदा चाळीतून पस्तीस कांद्याच्या गोण्या लंपास

शिरूर { डेली न्यूज पोस्ट टीम 24}: शिरूर तालुक्यातील तांदळी येथे शेतातील कांदाचाळीमधून अज्ञात चोरट्याने तब्बल 35 गोणी लाल कांदा चोरून नेल्याची घटना समोर आली आहे. या चोरीत शेतकऱ्याचे सुमारे 17 हजार 500 रुपयांचे नुकसान झाले आहे.

याबाबत भाऊसाहेब रघुनाथ गोसावी (वय 60, रा. तांदळी, ता. शिरूर) यांनी शिरूर पोलीस ठाण्यात फिर्याद दिली आहे. पोलिसांनी गुन्हा रजिस्टर क्रमांक 787/2026, भारतीय न्याय संहिता कलम 303(2) अन्वये अज्ञात चोरट्याविरुद्ध चोरीचा गुन्हा दाखल केला आहे.

पोलिसांनी दिलेल्या माहितीनुसार, 3 सप्टेंबर रोजी रात्री 8 वाजता ते 4 सप्टेंबर रोजी सकाळी 7 वाजण्याच्या दरम्यान तांदळी गावच्या हद्दीतील गोसावी यांच्या शेतातील कांदाचाळीत ही चोरी झाली. चोरट्याने चाळीमधील 35 गोणी लाल कांदा चोरून नेला. प्रत्येक गोणीचे वजन 50 किलो असून एकूण 1,750 किलो कांदा चोरीस गेला आहे. कांद्याची किंमत 10 रुपये प्रतिकिलोप्रमाणे 17,500 रुपये असल्याचे फिर्यादीत नमूद करण्यात आले आहे.

शेतातील कांदाचाळीतून मोठ्या प्रमाणावर कांदा चोरीला गेल्याने परिसरातील शेतकऱ्यांमध्येही चिंता व्यक्त होत आहे. या प्रकरणातील अज्ञात चोरट्याचा शोध घेण्याचे आव्हान पोलिसांसमोर आहे.

या प्रकरणाचा तपास पोलीस निरीक्षक विनोद पाटील यांच्या मार्गदर्शनाखाली सुरू आहे.