क्रीडेतून व्यक्तिमत्त्व विकास; विद्यार्थ्यांनी कला-क्रीडेकडेही लक्ष द्यावे

शिरूर l{ डेली न्यूज पोस्ट टीम 24}नवीन राष्ट्रीय शैक्षणिक धोरणामुळे शिक्षणासोबतच कला आणि क्रीडा क्षेत्रालाही महत्त्व प्राप्त झाले आहे. विद्यार्थ्यांनी शैक्षणिक अभ्यासा बरोबरच कला व क्रीडा क्षेत्राकडेही गांभीर्याने लक्ष द्यावे. क्रीडेमुळे विद्यार्थ्यांच्या व्यक्तिमत्त्वाचा सर्वांगीण विकास होतो, असे प्रतिपादन यशवंतराव चव्हाण महाराष्ट्र मुक्त विद्यापीठाचे पुणे विभागीय संचालक डॉ. व्ही.. बी.गायकवाड यांनी केले.

यशवंतराव चव्हाण महाराष्ट्र मुक्त विद्यापीठाच्या पुणे विभागीय क्रीडा स्पर्धांचे आयोजन शिरूर येथील चांदमल ताराचंद बोरा महाविद्यालयाच्या मैदानावर करण्यात आले होते. या स्पर्धांचे उद्घाटन डॉ. गायकवाड यांच्या हस्ते झाले. यावेळी बोरा महाविद्यालयाचे प्राचार्य डॉ. के. सी. मोहिते, उपप्राचार्य हरिदास जाधव, अभ्यास केंद्राचे मार्गदर्शक प्रा. चंद्रकांत धापटे, केंद्र संयोजक डॉ. अंबादास केत, क्रीडा विभागाचे बोबडे, डॉ. अप्पासाहेब चव्हाण, संतोष वामन, प्रदीप गायकवाड, यश धनगर, आरोग्य केंद्राचे डॉ. नरसिंग शिरसाठ, सत्यजित चिमटे, केंद्र सहाय्यक निळोबा भोगावडे, प्रा. रतनकुमार ससाणे, अनिल पांढरमिसे आदी उपस्थित होते.

गायकवाड म्हणाले कीआशियाई क्रीडा स्पर्धांमध्ये भारताने पदकतालिकेत चौथे स्थान मिळविले असून, तळागाळातून खेळाडू घडत असल्याचे डॉ. गायकवाड यांनी नमूद केले. गुणवंत खेळाडूंना महाराष्ट्र व केंद्र शासनाच्या माध्यमातून रोजगाराच्या संधी उपलब्ध होत असल्याने विद्यार्थ्यांनी क्रीडा क्षेत्रातही करिअरच्या संधी शोधाव्यात, असे आवाहन त्यांनी केले.

प्राचार्य डॉ. मोहिते म्हणाले की, मुक्त विद्यापीठ विद्यार्थ्यांच्या सर्वांगीण विकासासाठी सातत्याने कार्यरत आहे. क्रीडा क्षेत्रातही मोठ्या प्रमाणात करिअरच्या संधी आहेत. आयुष्यात खिलाडूवृत्तीला महत्त्व असून, खेळाच्या माध्यमातून शिस्त, नेतृत्व, संघभावना आणि आत्मविश्वास यांसारखे विविध गुण विद्यार्थ्यांच्या अंगी विकसित होतात.

यावेळी क्रीडा ज्योत प्रज्वलित करण्यात आली. ही ज्योत मैदानावर आणण्याचा मान राष्ट्रीय खेळाडू वैष्णवी वाखारे आणि अनिकेत साठे यांना मिळाला. स्पर्धेत सातारा, सोलापूर, पुणे शहर आणि पुणे जिल्ह्यातील विद्यार्थ्यांनी सहभाग घेतला.

कार्यक्रमाचे प्रास्ताविक डॉ. अंबादास केत यांनी केले. सूत्रसंचालन प्रा.डॉ .क्रांती गोसावी यांनी केले, तर आभार प्रा. चंद्रकांत धापटे यांनी मानले.